Kăn xiâm hnê ngăn tơnêi têa tối, Việt Nam ngăn nhoăm tơdroăng tơrŭm cheăng tung tŭm kơvâ cheăng ƀă Qatar; tối phiu ro hlo mâu tơdroăng  mơnhông tung tơrŭm cheăng pơla péa tơnêi têa; khěn kơdeăn khât tơdroăng tơpui tơno tơrá mâu kăn ƀă môi tuăn veăng kŭm dêi rơpó a mâu hneăng hôp tơpui hên tơdroăng.

Pôa Nguyễn Xuân Phúc, Kăn xiâm hnê ngăn tơnêi têa tơdah kăn xiâm Qatar

Vâ mơdêk tơrŭm krá tâ nếo pơla Việt Nam ƀă Qatar tung la ngiâ, Kăn xiâm hnê ngăn tơnêi têa pâ thế péa pâ tơrŭm tơkŭm po mâu tơdroăng chăng drêng troh leh tơbâ 30 hơnăm mơjiâng tơrŭm cheăng tơpui kâ a hơnăm 2023; mơdêk mâu tơdroăng cheăng tơpui kâ tơrá mâu khu kăn rêm râ; pơkâ thế khu mơdró ƀă mâu khu rak liăn ‘măn kơdĭng vâ ‘no liăn cheăng dêi Qatar mơdêk ‘no liăn cheăng a Việt Nam. Kăn xiâm hnê ngăn tơnêi têa púi vâ Kăn teăng mâ ing hnoăng cheăng pêi ki nếo, kô cho tíu xiâm tơdjêp mơdêk tơrŭm cheăng pơla péa tơnêi têa.