VOV4.Xơ Đăng - A Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, kăn xiâm hnê ngăn tơnêi têa hiăng tơdah pôa Bounthong Chitmany, Ngế cheăng tung tí xiâm kal kí, kăn pơkuâ ngăn Đảng Nhân dân kăch măng Lếo, kăn xiâm phŏ hnê ngăn tơnêi têa Kŏng hòa Dân chủ Nhân dân Lếo ƀă khu kăn xiâm Đảng, Tơnêi têa Lếo dế ối pôu Việt Nam. Pôa Nguyễn Xuân Phúc tối nhên Đảng, Tơnêi têa ƀă kuăn pơlê Việt Nam đi đo ngăn nhuô̆m, khŏm mơ-eăm rak vế ƀă ôh tá la lâi pơtê tơbêng, mơnhông tơrŭm cheăng kân rơdêi, tơrŭm tung tâi tâng Việt Nam – Lếo.

Pôa Nguyễn Xuân Phúc, Kăn xiâm hnê ngăn tơnêi têa tơdah kăn xiâm phŏ hnê ngăn kong têa Lếo

Péa ngế kăn xiâm pơkuâ tối nhên ki pơxúa kal dêi “Hơnăm tơrŭm tơroâ Viẹt Nam – Lếo, Lếo – Việt Nam 2022” ƀă hnoăng cheăng hnê tối, hnê hriâm mâu rơxông kuăn pơlê, malối cho mâu rơxông hơnăm ối nếo péa tơnêi têa, ‘na khôi hmâ tơrŭm cheăng, môi hiâm mơno ôh tá la lâi tơklâ pơla Việt Nam ƀă Lếo. Péa pâ môi tuăn pơtối mơdêk tơƀrê tơrŭm cheăng hnê hriâm, hnê cheăng pêi, khăm pơlât trâm mâ kuăn pơlê ƀă tơrŭm pơla mâu kong pơlê, pơtối tơrŭm krá tơniăn, tŏng kum dêi rơpó tung mâu tơdroăng cheăng a kong têa.

Katarina Nga tơplôu ƀă tơbleăng