Kơxo lơ 6/12, klêi kơ’nâi Hneăng hôp tơpui tơno Khu tê mơdró Việt Nam – Hàn Quốc a pơlê kong xiâm Seoul ƀă lối 500 ngế kăn teăng mâ troh ing mâu khu tê mơdró dêi péa tơnêi têa, pôa Nguyễn Xuân Phúc, Kăn xiâm hnê ngăn tơnêi têa hiăng pơkuâ roh tơpui tơno ƀă mâu Grup pơkuâ, khu tê mơdró kân Hàn Quốc tung kơvâ liăn ngân – hngêi arak liăn. A roh tơpui tơno, Kăn xiâm hnê ngăn tơnêi têa mơnhên, Việt Nam đi đo ngăn Hàn Quốc cho khu tơrŭm cheăng ton xŏn ki kal ƀă tơniăn ton; pói vâ rơtế Hàn Quốc pêi trâu hơngế tâ tung tơrŭm, Khu tơrŭm cheăng ton xŏn tŭm têk ƀă cho xiâm kối mơhnhôk ki kal cho tơrŭm cheăng kâ, tê mơdró ƀă mơ’no liăn cheăng.

Kăn xiâm hnê ngăn tơnêi têa tối nhên troăng pơkâ ton xŏn nếo dêi Việt Nam vâ pro tơ’lêi hlâu tâ, châ tơƀrê tâ ƀă kơxô̆ liăn FDI tung Việt Nam. Pơtối mê, Việt Nam pơ’lêh to ‘’mơhnhôk’’ kơxô̆ liăn FDI hdrối nah, chiâng ‘’tơrŭm cheăng’’ ton xŏn ƀă mâu khu mơ’no liăn cheăng kong têa ê tiô tơdroăng tơdâng tơ’mô, rơtế dêi pó mơnhông mơdêk, péa pâ châ pơxúa, rơtế ai hnoăng cheăng ƀă pơlê pơla, mơngế pêi cheăng, rak vế kong prâi.