VOV4.Xơ Đăng - Klăng leh tơbâ 75 hơnăm Hâi mô đô̆i rong râ – Hlâ hía (27/7/1947 – 27/7/2022), kơxo lơ 26/7, pôa Nguyễn Xuân Phúc, Kăn xiâm hnê ngăn tơnêi têa hiăng troh veăng Hneăng hôp kheăn kơdeăn mơngế ai hnoăng ƀă kăch măng kơhnâ rơkê tung Kŏng an kuăn pơlê hneăng hơnăm 2017 – 2022. Veăng hneăng hôp ai 461 ngế kăn teăng mâ ăm rơpâu ngế mô đô̆i rong râ, nhŏng o ai mô đô̆i hlâ tung tơplâ xâ ƀă mơngế ai hnoăng ƀă kăch măng hiăng ƀă dế pêi cheăng tung Kŏng an kuăn pơlê ing mâu rơxông.

Xông tơpui a Hneăng hôp, pôa Nguyễn Xuân Phúc pơtroh troh mâu kăn ƀô̆ Kŏng an hiăng prôk hdrối, mâu ngoh nâ khên tơnôu tung khu lêng kuăn pơlê, Mâu ngoh khên tơnôu pêi cheăng, mâu mô đô̆i rong râ, châi tamo, mâu nhŏng o ai mô đô̆i hlâ tung tơplâ xâ, mơngế ai hnoăng ƀă kăch măng, mâu khu pú hên, ngế krê rơkê tung tơdroăng pâ mơnê, rơtế tâi tâng kăn ƀô̆, mâu lêng khu Kŏng an kuăn pơlê rơkong kơ-êng, mâu tơdroăng tuăn pâ trâu hơngế ƀă hiâm mơno pâ mơnê trâu hơngế.

Kăn xiâm hnê ngăn tơnêi têa tối nhên, Đảng, Tơnêi têa ƀă kuăn pơlê kô troh tá ah pâ mơnê mâu ngoh khên tơnôu, mô đô̆i hlâ tung tơplâ xâ, mô đô̆i rong râ, mơngế ai hnoăng ƀă tơnêi têa, mâu lêng hiăng pleăng dêi châ chăn mơheăm chhá xua tơdroăng tơleăng lĕm hdroâng mơngế, mơjiâng ƀă gâk kring Tơnêi têa, rak tơdroăng rêh ối tơniăn ăm kuăn pơlê.

A Sa Ly tơplôu ƀă tơbleăng