VOV4.Xơ Đăng - Tiô rơkong krếo thế dêi pôa Nguyễn Xuân Phúc, Kăn xiâm hnê ngăn tơnêi têa, jâ Halimah Yacob, kăn xiâm pơkuâ kong têa Singapore rơtế ƀă kơnốu jâ hiăng pơkuâ djâ khu râ kăn xiâm Singapore lăm pôu râ Tơnêi têa troh Việt Nam sap ing hâi lơ 16 – 20/10/2022. Kơxo hâi lơ 17/10/2022, leh tơdah hiăng châ tơkŭm po kân krip a Tíu pêi cheăng kăn xiâm hnê ngăn tơnêi têa. Klêi kơ’nâi leh tơdah, pôa Nguyễn Xuân Phúc hiăng tơpui tơno ƀă kăn xiâm pơkuâ kong têa Singapore.

A rôh tơpui tơno ‘na mâu túa pơkâ tơrŭm cheăng kân tung la ngiâ, péa pâ hiăng môi tuăn pơtối mơdêk pơtroh mâu khu râ kăn xiâm ƀă rak vế tơƀrê mâu tơdroăng tơrŭm cheăng ki kal tung mâu Đảng, Tơnêi têa, Chin phuh, Kuô̆k hô̆i ƀă trâm mâ Kuăn pơlê, tơrŭm khu mơdró kâ. Kăn xiâm hnê ngăn tơnêi têa pơkâ thế Singapore pro tơ’lêi hlâu lôu péa rơdâ tâ nếo ăm kế tơmeăm Việt Nam môi tiah ká xi xŏng, hmân ếo pơchoh, kế kâ ƀă hên ki ê châ mot tung kơchơ mơdró Singapore; kum Việt Nam veăng trâu châ tơrŭm hngế tâ tung tơdroăng tê tung lâp plâi tơnêi.

Péa ngế kăn pơkuâ châ hlo leh kĭ tơkêa, diâp mâu hlá mơ-éa tơrŭm cheăng pơla péa tơnêi têa

Tơpui ‘na tơdroăng tung kơpong ƀă lâp plâi tơnêi, péa ngế kăn xiâm pơkuâ vêh tối nhên tuăn tơmiât dêi ASEAN ‘na Biển Đông ƀă tơdroăng pêi ki kal dêi rak vế hơniâp lĕm, gâk kring, rak tơniăn krê a têa kơxĭ ƀă a hbo plêng; pơkâ tơleăng tơdroăng tơxup tơbriât, tơtro ƀă luât lâp plâi tơnêi, tung mê, ai Tơkêa Khu lâp kong têa ‘na Luât têa kơxĭ (UNCLOS) 1982.

VOV/Tơplôu: Katarina Nga