VOV4.Xơ Đăng - Kơmăng lơ 19/8, Đảng ƀô̆ ƀă kuăn pơlê a tơring Quế Sơn, kong pơlê Quảng Nam hiăng po leh kân krip Koh tơbâ 50 hơnăm hâi Ƀlê trâng Cấm Dơi. Veăng leh mê ai pôa Nguyễn Xuân Phúc, Kăn xiâm hnê ngăn tơnêi têa, khu kăn pơkuâ hnê ngăn kong pơlê Quảng Nam, Kuân khu 5, tơring Quế Sơn, mâu vâi nôu Việt Nam khên tơnôu, Khu lêng khên tơnôu, mâu kăn lêng, mâu lêng hơnăm hiăng krâ, mâu rơpŏng ai hnoăng ƀă kăch măng, kơdrâm kơdrĕng kuăn pơlê a tơring Quế Sơn xuân veăng ai mâ.

Pôa Nguyễn Xuân Phúc, Kăn xiâm hnê ngăn rơtế ƀă khu kăn pơkuâ hnê ngăn Đảng têk nhang koh tơbâ khu lêng hiăng hlâ a tơnâp kiâ tơring Quế Sơn

Kơtăn kố ai 50 hơnăm, tơdrêng ƀă tơdroăng ki xông pơplâ ƀă tơrŭm môi tuăn dêi khu lêng ƀă kuăn pơlê peăng Hdroh, kơnôm ai tơdroăng pơkuâ ngăn dêi Đảng, ki xiâm cho Khu ủy Khu 5 ƀă Khu pơkuâ hnê ngăn Đảng kong pơlê Quảng Nam, khu lêng Kuân 5 ƀă mâu lêng ối tung tơring hiăng rơtế ƀă mâu kăn ƀô̆, lêng Sư đoân 711. Tiêuh đoân dêi Kuân Khu 5, hiăng khên tơnôu tơplâ pro tơleăng lĕm Quế Sơn, veăng kum pro tơleăng lĕm kong pơlê Quảng Nam.

Pơtối mơdêk hnoăng cheăng khên tơnôu, krá rơdêi tung hnoăng plâ xâ, mâu hơnăm hdrối mê hiá nah, Đảng ƀô̆ Quế Sơn hiăng pơkuâ kuăn pơlê châ chiâng pêi pro hên tơdroăng cheăng ki kal. Kơlo ki tơtêk dêi pêi cheăng kâ hiăng a’ngêi ƀă tơniăn, tơdroăng pêi lo kế tơmeăm hiăng chía mơnhông hên tâ hneăng hdrối mê hía nah.

Nhat Lisa tơplôu ƀă tơbleăng