Hâi lơ 3/1, pôa Nguyễn Xuân Thắng, Kăn hnê ngăn Hô̆i đong lĭ luâ̆n Tơnêi têa troh pôu, hbru tơmeăm ƀă rơkâu Têt mâu rơpŏng ki ai troăng hơlâ tŏng kum, mâu tíu pêi cheăng khu lêng kring vế tơniăn a tơring tơkăng kong Bình Liêu (Quảng Ninh).

Pôu kăn ƀô̆, lêng Đông mố đô̆i gâk tơkăng kong, lêng têa kơxĭ, Khu rak ngăn bo cheăng Hoành Mô ƀă cheăm Hoành Mô, pôa Nguyễn Xuân Thắng pơtroh rơkong rơkâu tơniăn lĕm má môi troh kăn ƀô̆ lêng, kuăn pơlê a cheăm tơring rơtế tơdah Têt Quý Mão hơniâp ro; pơkâ thế mâu tíu pêi cheăng ki ai tơdjâk đi đo hbrâ rơnáu mơdât hdrối, tung ƀă klêi kơ’nâi Têt Lo hơnăm nếo, hbrâ rơnáu mâu túa pơkâ hbrâ mơdât tơƀrê mâu tơdroăng ki ôh tá tơniăn tâng trâm vâ kuăn pơlê hơniâp ro tơdah Têt, pro tơ’lêi hlâu vâ mơnhông mơdêk cheăng kâ rêh ối dêi kong pơlê Quảng Ninh ƀă lâp tơnêi têa.