VOV4.Xơ Đăng - Tiô rơkong krếo thế dêi Chin phuh kong têa Sinuâ, hâi lơ 16/9, pôa Phạm Bình Minh, Ngế pro xâm phŏ hnê ngăn tơnêi têa veăng hôp tối tơbleăng a hâi Leh pơxiâm po kơchơ ASEAN - Sinuâ ƀă hneăng hôp mâu kăn xiâm Ngăn tê mơdró ‘no liăn cheăng dêi ASEAN - Sinuâ  pơxá (CAEXPO và CABIS) rôh má 19 a Nam Ninh, Kơpong pơkuâ ngăn dêi kuăn ngo Choang Quảng Tây, kong têa Sinuâ tiô tơdroăng xup um  mơhno.

Tối tơbleăng a hâi Leh pơxiâm po, pôa Phạm Bình Minh, Ngế xiâm phŏ hnê ngăn tơnêi têa khĕn kơdeăn khât tơdroăng ki péa pâ mơjiâng tơdroăng Tơrŭm cheăng tung tâi tâng xua vâ pro hơniâp lĕm, kring tơniăn, hơniâp hlối mơnhông mơdêk krá tơniăn; ASEAN ƀă Sinuâ pơtối tơrŭm tê mơdró kân má môi ƀă dêi rơpó, tâi tâng kơxô̆ liăn pêi lo tê mơdró pơla péa pâ châ hên nếo lối 669 rơtal dollars.

Pôa Phạm Bình Minh pơkâ thế chin phuh Sinuâ pro tơ’lêi hlâu tơdroăng rôe  hên tâ nếo, mâu tơmeăm pêi lo dêi Việt Nam xuân môi tiah mâu kong têa tung ASEAN tê luâ Việt Nam; mơdêk tơrŭm tung mâu tơdroăng cheăng pơ’lêh hriăn plĕng ki nếo, pơ’lêh kơxô̆, cheăng kâ kơxô̆, tê mơdró điê̆n tưh; mơdêk tơrŭm cheăng tung mâu kơvâ cheăng ki lĕm, krá tơniăn.

Gương tơplôu ƀă tơbleăng