VOV4.Xơ Đăng - Kơxo lơ 1/8, pôa Phạm Bình Minh, Ngế pro xiâm phŏ hnê ngăn tơnêi têa pơkuâ po rôh hôp Tôh pêi dêi hnoăng cheăng kơxô̆ 1 dêi Ngế pro xiâm hnê ngăn Chin phuh, séa ngăn ‘no liăn ăm tơdroăng cheăng tơdjuôm a 7 khu xiâm, kơ koan Tơnêi têa ƀă 4 to kong pơlê. Tiô hlá mơ-éa tối tơbleăng dêi Khu xiâm pơkâ ƀă ‘no liăn cheăng, Ngế pro xiâm hnê ngăn Chin phuh pơcháu tâi tâng kơxô̆ liăn Tơnêi têa lối 24 rơpâu rơtal liăn ăm 7 to khu xiâm, kơ koan Tơnêi têa ƀă 4 to kong pơlê, la troh nôkố kơxô̆ liăn ‘no nếo châ dâng 15% túa pơcháu.

Pôa Phạm Bình Minh, Ngế pro xiâm phŏ hnê ngăn tơnêi têa pơkuâ po rôh hôp

Mơgêi rôh hôp, pôa Phạm Bình Minh tối nhên tơdroăng ki phá tơ-ê tung tơdroăng ki ‘no liăn ối a tơdroăng ki veăng kum kơhnâ dêi rêm ngế kăn ƀô̆, kơvâ cheăng ƀă kong pơlê. Ƀă tơdroăng ki ti châ ‘no liăn, mâu khu xiâm, kơvâ cheăng, kong pơlê rĕng séa ngăn, pơkâ mơ’no pơtroh túa pơkâ kơxô̆ liăn ăm mâu khu xiâm, kơvâ cheăng, kong pơlê ki ê dế kal liăn vâ tơbleăng.

Kal ai tơdroăng riân ngăn tâi tâng, hbrâ rơnáu tơnêi tíu, athế tơrŭm ƀă mâu khu xiâm, kơvâ cheăng Tơnêi têa vâ rĕng ai tơnêi tíu tơbleăng pêi pro mâu tơdroăng pơkâ.

Katarina Nga tơplôu ƀă tơbleăng