VOV4.Xơ Đăng - Kơxê lơ 23/8, a tíu pêi cheăng Chin phuh, Hô̆i đong Tiâ mơnhên tơdroăng ki ăm lo ing khoăng phâk hdrối tâ hâi khế pơkâ séa ngăn inâi pâ thế kăn xiâm hnê ngăn tơnêi têa ăm lo hdrối tâ hâi khế pơkâ ăm mâu ngế ki kroăng phâk ki ai tơdroăng ki châ ăm lo hdrối tâ hâi khế pơkâ lơ 2/9/2022. Pôa Phạm Bình Minh, Ngế pro xiâm phŏ hnê ngăn Chin phuh, Kăn xiâm hnê ngăn Hô̆i đong tiâ mơnhên tơdroăng ki ăm lo hdrối tâ khế hơnăm pơkâ 2022 pơkuâ po rôh hôp. Vâ tơdroăng ki séa ngăn inâi châ rak tơniăn, tơdrăng, Hô̆i đong Tiâ mơnhên athế séa ngăn rêm ngế pâ thế châ ăm lo hdrối tâ khế hơnăm pơkâ ƀă mâu tơdroăng pêi pro kơtăng tro tiô Luât ki ăm lo hdrối tâ khế hơnăm pơkâ.

Tơpui a rôh hôp, pôa Phạm Bình Minh ăm ‘nâi, ăm lo hdrối tâ khế hơnăm pơkâ cho pêi pro troăng hơlâ tŏng kum dêi Đảng, Tơnêi têa; pơkâ thế rêm râ, rêm kơvâ cheăng kal tơmâng ngăn troh hnoăng cheăng ki vêh tơrŭm ƀă pơlê pơla ăm ngế ki châ ăm lo hdrối tâ hâi khế pơkâ vêh a kong pơlê. Tơdrêng amê hlối tơkŭm mơdêk hnê tối tơdjuôm ivá kum ngế ki châ ăm lo hdrối tâ hâi khế pơkâ mê.

Katarina Nga tơplôu ƀă tơbleăng