VOV4.Xơ Đăng - A Đà Nẵng, kơxo lơ 25/7, pôa Phạm Bình Minh, Ngế pro xiâm phŏ hnê mơhno má môi Chin phuh rơtế khu râ kăn lăm kơ-êng, diâp kơxuô tơmeăm Tíu xiâm păn roăng rak ngăn mâu ngế ai hnoăng kăch măng, mô đô̆i rong râ châi tamo a pơlê kong kân Đà Nẵng, tíu dế păn roăng, rak ngăn 48 ngế ai hnoăng ƀă kăch măng ƀă nhŏng o mô đô̆i ôh tá ai ngế rak ngăn.

Ngế pro xiâm phŏ hnê ngăn tơnêi têa xup um ƀă mâu jâ pôa, mâu nôu dế châ rak ngăn a Tíu xiâm păn roăng mơngế ai hnoăng tơnêi têa pơlê kong kân Đà Nẵng

 Pôa Phạm Bình Minh troh kơ-êng ivá mâu nôu, mâu mô đô̆i rong rong châi tamo; mơnhên ƀă kheăn kơdeăn mâu tơdroăng mơ-eăm dêi Khu kăn pơkuâ, nhân viên tíu xiâm hiăng tá hiêm mơno rak ngăn, păn roăng mơngế ai hnoăng. Ngế pro xiâm phŏ hnê ngăn tơnêi têa pơkâ thế Tíu xiâm pơtối rak ngăn, păn roăng lĕm mâu ngế ai hnoăng dế rêh ối a kố. Kơ’nâi mê, pôa Phạm Bình Minh rơtế khu râ kăn pêi cheăng hiăng troh lăm pôu, kơ-êng, diâp kơxuô tơmeăm ăm rơpŏng ai hnoăng ki kơhnâ rơkê.

A Sa Ly tơplôu ƀă tơbleăng