VOV4.Xơ Đăng - Kơxo lơ 15/8, pôa Phạm Bình Minh, Ngế pro xiâm phŏ hnê ngăn Chin phuh veăng a Hâi mơdĭng Tâi tâng kuăn pơlê gâk kring Tơnêi têa hơnăm 2022 a cheăm Việt Dân, pơlê kong krâm Đông Triều, kong pơlê Quảng Ninh. Tơpui a Hâi mơdĭng, Ngế pro xiâm phŏ hnê ngăn tơnêi têa tơmâng xo ƀă khĕn kơdeăn mâu tơdroăng ki hiăng pêi pro klêi tung tơdroăng Tâi tâng kuăn pơlê rak vế gâk kring tơnêi têa Việt Dân hơnăm 2022, malối cho mâu tơdroăng ki tơƀrê tung mơnhông mơdêk cheăng kâ ƀă ăm cheăm pêi klêi thôn pơlê nếo tiô túa nếo ki apoăng dêi lâp tơnêi têa.

Pôa Phạm Bình Minh, Ngế pro xiâm phŏ hnê ngăn tơnêi têa veăng a Hâi mơdĭng Tâi tâng kuăn pơlê rak vế gâk kring Tơnêi têa a Quảng Ninh

Ngế pro xiâm phŏ hnê ngăn tơnêi têa pơkâ thế rêm râ Đảng, khu kăn pơkuâ, Vi ƀan Măt trâ̆n Tơnêi têa Việt Nam rêm râ, mâu khu tơrŭm rêm râ pơlê pơla a kong pơlê Quảng Ninh pơtối tơmâng ngăn tâ nếo vâ “Hâi mơdĭng tâi tâng kuăn pơlê rak vế gâk kring Tơnêi têa” rế hía rế ai pơxúa, mot trâu hơngế, kum tơƀrê mâu hnoăng cheăng kal kí, cheăng kâ, mơhno túa lĕm tro pơlê pơla dêi kong pơlê.

Drêng kố, pôa Phạm Bình Minh hiăng pôu, hbru tơmeăm ăm mâu rơpŏng ki kơhnâ rơkê tung tơdroăng rak vế gâk kring tơnêi têa a cheăm Việt Dân; hên khu pú hên ƀă mâu ngế krê ki kơhnâ rơkê tung tơdroăng tâi tâng kuăn pơlê rak vế gâk kring tơnêi têa cheăm Việt Dân châ xo ƀâng khê̆n kơdeăn, hlá mơ-éa khĕn kơdeăn.

Katarina Nga tơplôu ƀă tơbleăng