VOV4.Xơ Đăng - Kơxo lơ 24/7, tung tơdroăng lăm pôu pêi cheăng a Nghệ An, pôa Phạm Minh Chính, Ngế pro xiâm hnê ngăn Chin phuh ƀă khu kăn lăm pôu pêi cheăng ƀă Khu xiâm pơkuâ ngăn lêng Kuân khu 4. Tơbleăng akố, pôa Phạm Minh Chính tối nhên: “Ôh tá ai Kuân khu ki lâi ai hên ilâng kiâ mâu lêng môi tiah Kuân khu 4, ai hên ngế hlâ xua tơplâ  châ ‘mế a tơnêi dêi Kuân khu 4. Mê Kuân khu 4 kal  thế pêi pro tro tâ nếo tơdroăng mơnê mâu ai hnoăng, pro tơ’lêi hlâu tâ nếo ăm kuăn pơlê, mâu vâi pú tung lâp tơnêi têa pêi pro tro mâu rơdroăng pâ mơnê kơ mâu ai hnoăng, mâu rơpŏng ai hnoăng tơnêi têa, mâu lêng hlâ ai hnoăng”.

Ngế pro xiâm hnê ngăn tơnêi têa pêi cheăng ƀă Khu xiâm pơkuâ lêng Kuân khu 4

Tung 2 rôh tơplâ xâ Pơhlăng, xâ Mih ƀă kring vế tơnêi têa, Kuân khu ai 198 rơpâu 659 ngế hlâ ai hnoăng tơnêi têa, 113 rơpâu 597 ngế lêng rong râ, 12 rơpâu 316 ngế Jâ Nôu Việt Nam khên tơnôu, 51 rơpâu 286 ngế tro tơdjâk tro trếo ‘mêi rôh tơplâ nah.

Ngế pro xiâm hnê ngăn tơnêi têa pêi cheăng ƀă kong pole Nghệ An 

**** Kơxê lơ 24/7, pôa Phạm Minh Chính, Ngế pro xiâm hnê ngăn Chin phuh pêi cheăng ƀă Khu pơkuâ tơdroăng cheăng Đảng kong pơlê Nghệ An ‘na po rơdâ pêi pro, tơdroăng châ tơƀrê pêi pro Pơkâ Hneăng hôp má XIII dêi Đảng ƀă Pơkâ Hneăng hôp Đảng ƀô̆ kong pơlê roh má XIX, hneăng hơnăm 2020 – 2025. Tiô tơbleăng dêi kong pơlê Nghệ An, tơdrốu khế apoăng hơnăm 2022, tâi tâng tơmeăm tung kong pơlê tiô tối hdrối tâk 8,44% (ối má 2 kơpong Bắc Trung Bộ, ối má 18/63 kong pơlê, pơlê kong kơdrâm ối tung Tơnêi têa).

Kơpong tê mơdró cho tơniăn ó rơdêi, tâk 9,22%. A roh pêi cheăng, khu râ kăn pơkuâ kong pơlê Nghệ An hiăng tối pâ thế ƀă Chin phuh, Ngế pro xiâm hnê ngăn Chin phuh ‘na tơdroăng pơ’lêh pơkâ tơraih tơƀai lâp plâi tơnêi Vinh vâ mơdêk ivá pêi cheăng troh hơnăm 2030 sap ing 8 rơtuh to 12 rơtuh tơmối/hơnăm; pơkâ thế ti tăng liăn vâ pro troăng kân ăm phêp rơxế kơtâu têi  Vientiane – Hà Nội; pơkâ thế Ngế pro xiâm hnê ngăn tơnêi têa ƀă mâu khu xiâm, kơvâ Tơnêi têa tơmâng tŏng kum liăn chêl ƀăng tơnêi rơnêu pro troăng, po rơdâ troăng kân tơnêi têa 1, kơpong tơkâ kong pơlê Nghệ An ƀă hía hé.

Klêi kơ’nâi tơmâng rơkong xông tơpui a roh pêi cheăng, pôa Phạm Minh Chính tối nhên, kong pơlê kal vêh séa ngăn mâu tơdroăng tơkêa bro xua kơxô̆ liăn ai iâ, thế rah ki xiâm, tơdâng tơ’mô, pêi cheăng ki lâi klêi tơdroăng cheăng mê. Mơhnhôk mơ’no liăn cheăng ai hên pơ’lêh nếo, laga tá hâi châ tơƀrê hên, tá hâi ai mâu khu tê mơdró kân mơ’no liăn cheăng akố... Tung la ngiâ, Nghệ An kal thăm pơ’lêh tung tơdroăng tơmiât, troăng pêi la ngiâ ton xŏn, xúa tâi tâng mâu tơmeăm ki ai hlâu ki phá tơ-ê, roh tơ’lêi, ki tơ’lêi tơbriât cheăng, mơhnhôk pơlê pơla, kuăn pơlê veăng vâ mơnhông mơdêk.

Gương – A Sa Ly tơplôu ƀă tơbleăng