VOV4.Xơ Đăng - Kơxê lơ 19/7, klăng leh tơbâ 75 hơnăm hâi Mô đô̆i rong râ hlâ hía, pôa Phạm Minh Chính, Ngế pro xiâm hnê ngăn Chin phuh hiăng troh lăm pôu ƀă diâp kơxuô tơmeăm ăm khu mô đô̆i rong râ hlâ hía a Tíu xiâm pơlât ƀă rak ngăn mô đô̆i rong râ Kim Bảng, kong pơlê Hà Nam.

Teăng mâ Khu râ kăn pơkuâ Đảng, Tơnêi têa ƀă tơdroăng tuăn pâ krê, pôa Phạm Minh Chính, Ngế pro xiâm hnê ngăn Chin phuh hiăng pơtroh rơkong troh mâu mô đô̆i rong râ, châi tamo, mơngế ai hnoăng ƀă kăch măng tung lâp tơnêi têa ƀă mâu ngoh nâ mô đô̆i rong râ, châi tamo dế pơlât ƀă rak ngăn a Tíu xiâm pơlât ƀă rak ngăn mô đô̆i rong râ Kim Bảng mâu rơkong kơ-êng tá hiâm mơno cho toăng hngêi tơdjuôm hơtôu tuăn pâ dêi 77 ngế mô đô̆i rong râ, châi tamo, rong ivá 81% tơngi klêng ƀă 35 ngế nhŏng o mơngế ai hnoăng tơnêi têa.

Ngế pro xiâm hnê ngăn tơnêi têa lăm pôu Tíu xiâm pơlât ƀă rak ngăn mô đô̆i rong râ Kim Bảng, kong pơlê Hà Nam

Klăng roh kố, Ngế pro xiâm hnê ngăn tơnêi têa pơkâ thế Khu xiâm pơkuâ cheăng pêi, Mô đô̆i rong râ ƀă Rêh ối pơlê pơla ƀă mâu kơ koan ki tơdjâk pêi pro kơtăng troăng hơlâ ƀă mơngế ai hnoăng ƀă kăch măng, mơnhên tơdroăng rak ngăn pêi pro troăng hơlâ kơjo mơngế ai hnoăng cho hnoăng tơná, hnoăng cheăng pêi đi đo, ton xŏn dêi khu cheăng kal kí ƀă tâi tâng pơlê pơla.

A Sa Ly tơplôu ƀă tơbleăng