Kơxo lơ 28/5, pôa Phạm Minh Chính, Ngế pro xiâm hnê ngăn Chin phuh pêi cheăng ƀă Khu pơkuâ ngăn Đảng Hà Giang vâ mơnhên tối tơdroăng klêi kơ’nâi mơnhông mơdêk cheăng kâ rêh ối pơlê pơla hơnăm 2022, mâu khế apoăng hơnăm 2023; pơkâ mơ’no túa pơkâ, hnoăng cheăng tung la ngiâ ƀă pơkâ tơleăng mâu pâ thế dêi Hà Giang. Klêi kơ’nâi tơmâng mâu rơkong tơpui tối dêi mâu khu xiâm, kơvâ cheăng, mơgêi rôh pêi cheăng, teăng mâ Chin phuh, pôa Phạm Minh Chính khĕn kơdeăn ivá mơ-eăm ƀă klêi kơ’nâi hiăng pêi pro klêi dêi Đảng ƀô̆, khu kăn pơkuâ ƀă kuăn pơlê kong pơlê Hà Giang, veăng kum mâu tơdroăng tơdjuôm mê dêi lâp tơnêi têa.

‘Na hnoăng cheăng, troăng hơlâ pơkâ ki kal tung la ngiâ Ngế pro xiâm hnê ngăn tơnêi têa tối nhên, athế tơrŭm môi tuăn tung khu xiâm kơvâ cheăng, tơrŭm krá tơniăn ƀă tơnêi têa, tơkŭm pơkuâ, hnê mơhno pêi pro 3 tơdroăng ki xiâm tung la ngiâ, malối cho cho tơkŭm ‘no liăn pêi cheăng tơdjuôm, pêi pro tro hnoăng cheăng pơkâ ƀă mơjiâng bro hngêi trăng, troăng klông; ngăn kố cho hnoăng cheăng kal kí ki kal. Pơtối pêi klêi túa pơkâ kong pơlê hơnăm 2021 – 2030, troăng ngăn troh hơnăm 2050 tro tơdroăng, rơkê, dâi lĕm.