Kơxo hâi lơ 5/5,  a tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ hneăng hôp Chin phuh tiah hmâ khế 4 ƀă 4 khế apoăng hơnăm 2023. Khế 4 ƀă 4 khế apoăng hơnăm, Chin phuh, mâu khu xiâm, kơvâ cheăng, kong pơlê hiăng mơ-eăm pêi tiô pơkâ; Kăn hnê ngăn, hnê mơhno ƀă hnê pêi kơtăng tơbleăng pêi mâu tơdroăng cheăng, troăng rơhlâ hiăng pơkâ hdrối.

Tung hneăng hôp rôh kố, mâu kăn tung Chin phuh hiăng tơpui tơdrăng tơkŭm tơpui a tơdroăng mơnhông cheăng kâ rêh ối khế 4 ƀă 4 khế apoăng hơnăm, tơdroăng cheăng vâ pêi ki kal tung khế 5 ƀă tung la ngiâ ah nếo tơdrêng ƀă mâu tơdroăng kal ki ê ‘na xo liăn ngân ‘no mơjiâng tơmeăm khoăng tơnêi têa, Tơdroăng ‘mâi mơnhông ƀă mơdêk cheăng kâ rêh ối, 3 tơdroăng cheăng ‘na hyôh kong prâi dêi tơnêi têa.

Tơbleăng mơgêi hneăng hôp, pôa Phạm Minh Chính pơkâ thế, mơ-eăm pêi tro tiô pơkâ rak tơniăn ‘na cheăng kâ kân, séa ngăn liăn ôh tá kơnâ, mơdêk pêi lo tơmeăm, tơniăn tơdâng tơ’mô kân dêi tơdroăng cheăng kâ; tơmâng khât troh ‘na mơhno túa lĕm tro, rêh ối pơlê pơla; ‘mâi mơnhông kring vế tơniăn tíu tơkăng kong; mơdêk tơpui kâ, tơrŭm tơrôa ƀă lâp plâi tơnêi ƀă mơdêk tối ăm dêi rơpó ‘nâi mâu tơdroăng, hnê tối, pro xiâm ki môi tuăn tung pơlê pơla.

Tơkŭm veăng kơjo kum ƀă mơdêk pêi lo tơmeăm tê mơdró, 3 tơdroăng pêi tơƀrê, 3 tơdroăng mơ-eăm châ tâk tơƀrê, kum ăm kuăn pơlê ai cheăng pêi ƀă châ xo tơ’mot liăn cheăng kâ ăm kuăn pơlê.