Kơxo hâi lơ 21/4, a tíu pêi cheăng Chin phuh, pôa Phạm Minh Chính Ngế xiâm hnê ngăn Chin phuh pơkuâ leh tơdah Ngế xiâm hnê ngăn kong têa Czech pôa Petr Fiala ƀă khu kăn xiâm kong têa Czech lăm pôu Việt Nam sap hâi lơ 20 troh hâi lơ 22/4. Leh tơdah châ tơkŭm po kân krip tiô pơkâ ăm mơngế ki pơkuâ Chin phuh lăm pôu Việt Nam. 

Pôa Phạm Minh Chính krếo pôa Petr Fiala ngăn Khu châ kơdeăn dêi mâu lêng Việt Nam, klêi mê péa ngế pro xiâm hnê ngăn tơbleăng tối inâi rêm ngế tung Khu kăn xiâm péa pâ veăng Leh tơdah. Hneăng lăm pôu Việt Nam cho hneăng lăm pôu châu Á ki apoăng dêi pôa Petr Fiala riân sap to pro kăn a mơ’nui hơnăm 2021 ƀă cho hneăng lăm pôu apoăng dêi ngế pơkuâ Chin phuh Czech troh a Việt Nam tung 15 hơnăm hdrối.

Tung hneăng lăm pôu Việt Nam drêng kố, klêi hôp tơpui tơno, pôa Phạm Minh Chính prế pôa Petr Fiala kô tơpui ƀă pôa Võ Văn Thưởng - Kăn xiâm hnê ngăn tơnêi têa; rơtế ƀă pôa Phạm Minh Chính veăng hôp mâu Khu mơdró Việt Nam  ƀă Czech ƀă mâu tơdroăng cheăng kal ki ê.