VOV4.Xơ Đăng - Kơxo lơ 29/9, a tíu pêi cheăng dêi Kăn xiâm hnê ngăn tơnêi têa, pôa Phạm Minh Chính, Ngế pro xiâm hnê ngăn Chin phuh pơkuâ leh tơdah pôa Manuel Marrero Cruz, Ngế pro xiâm hnê ngăn kong têa Cuba ƀă mâu kăn xiâm Chin phuh Cuba dế lăm pôu, pêi tơrŭm cheăng a Việt Nam. Kơ’nâi leh tơdah, pôa Phạm Minh Chính, Ngế pro xiâm hnê ngăn tơnêi têa prế pôa Manuel Marrero Cruz, Ngế pro xiâm hnê ngăn kong têa Cuba hôp tơpui tơno ƀă dêi rơpó.

Ngế pro xiâm hnê ngăn Chin phuh pơkuâ Leh tơdah Ngế pro xiâm hnê ngăn kong têa Kŏng hoa Cuba

Kố cho hneăng cheăng lăm pôu dêi Ngế pro xiâm hnê ngăn kong têa Cuba vâ tơbleăng mâu tơdroăng tơhrâ châ pêi pro pơla péa kăn xiâm dêi péa tơnêi têa, pơtối mơdêk tơrŭm cheăng pơla Việt Nam - Cuba, mơhno ki mơ-eăm dêi péa pâ tung pơtối mơnhông mơdêk ƀă tơrŭm krá khât tâ nếo tơdroăng tơrŭm, môi tuăn loi nhoăm dêi rơpó, tơrŭm cheăng tung tâi tâng pơla Đảng, Tơnêi têa, Chin phuh ƀă kuăn pơlê péa tơnêi têa.  

Drêng lăm pôu pêi cheăng, Ngế pro xiâm hnê ngăn kong têa Cuba hâk tơngăm tơdah xo Mê dai Hồ Chí Minh; veăng leh kĭ hlá mơ-éa tơrŭm cheăng pơla péa pâ; hneăng hôp khu mơdró Việt Nam - Cuba; trâm mâ mâu kăn xiâm pơlê kong kân Hồ Chí Minh ƀă mâu tơdroăng cheăng pêi ki ê.

VOV/Tơplôu: Gương