A roh tơdah, pôa Phạm Minh Chính, Ngế pro xiâm hnê ngăn tơnêi têa rơkâu Kăn teăng mâ Lếo hiăng pêi kêi đeăng hnoăng cheăng a Việt Nam ƀă rế hâk tơngăm châ Đảng, Tơnêi têa Việt Nam diâp Mê dái pêi cheăng ối má môi xua hiăng ai tơdroăng veăng kum ki kal tung tơdroăng pro rơdêi ƀă thăm pêng păm tơdroăng tơrŭm nhŏng o, rŭm môi tuăn ki má môi ƀă tơrŭm tŭm têk Việt Nam – Lếo.

Kăn teăng mâ Lếo mơnhên, ƀă tơdroăng tuăn pâ achê, rŭm ƀă tơnêi têa ƀă kuăn mơngế Việt Nam ƀă xua pơxúa tơdjuôm dêi péa tơnêi têa, péa hdroâng kuăn ngo, pôa pơtối veăng kum ăm tơrŭm cheăng “ki bu ai môi tê ôh tá ai péa’’ pơla Việt Nam ƀă Lếo đi đo lĕm, krá tơniăn troh tá ah.