Kơxê hâi lơ 5/5, a tiú pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Nikai Toshihiro, Kăn xiâm hnê ngăn Khu tơrŭm cheăng Kuô̆k hô̆i pơla Nhuk - Việt Nam ƀă mâu ngế dêi Khu kăn hnê mơhno tơrŭm cheăng.

A rôh trâm mâ, Ngế pro xiâm hnê ngăn Chin phuh hiăng tơbleăng ăm tâi tâng khu kăn ‘nâi hnoăng ki hiăng châ chiâng pêi pro dêi Việt Nam tung tơdroăng pơ’lêh nếo, mơnhông cheăng kâ - rêh ối; tối Việt Nam mơ-eăm mơnhông cheăng kâ tơniăn pơkuâ dêi rơtế ƀă mơ-eăm pêi khât, hbrâ rơnáu tơrŭm tơrôa ƀă lâp plâi tơnêi trâu rơdâ; pêi ahdrối 03 tơdroăng ki kal mê cho ‘mâi hơ’lêh tơdroăng cheăng, mơjiâng tơmeăm khoăng, hnê mâu ngế vâ pêi cheăng; pâ thế pôa Nikai mơhnhôk Chin phuh Nhuk pơtối kum ODA ki nếo ăm Việt Nam tung mâu tơdroăng mơjiâng tơmeăm khoăng troăng prôk; púi vâ mâu khu ‘no liăn cheăng dêi Nhuk mơdêk ‘no liăn pêi cheăng mơjiâng tơmeăm khoăng a Việt Nam tiô tơdroăng péa pâ rơtế ai pơxúa, tối ăm dêi rơpó ‘nâi ki ôh tá mơhúa, ki pơxúa tơtro.