VOV4.Xơ Đăng - A tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah Kăn xiâm pơkuâ kong têa Singapore - jâ Halimah Yacob dế lăm pôu pêi cheăng râ kăn xiâm Tơnêi têa troh a Việt Nam.Kăn xiâm pơkuâ kong têa Singapore mơnhên tối, Singapore nhuô̆m mơnhông mơdêk tơrŭm cheăng ton xŏn ƀă Việt Nam. ‘Na tơrŭm cheăng péa tơnêi têa, Ngế pro xiâm hnê ngăn tơnêi têa pơkâ thế péa pâ tơrŭm cheăng po rơdâ pêi pro châ tơƀrê mâu hlá mơ-éa ki kal nếo kĭ tung roh lăm pôu pêi cheăng, kum pêi pro châ tơƀrê mâu kơvâ cheăng tơrŭm cheăng ki mơnhông pơla péa tơnêi têa ‘na on tơhrik vêh pro, gâk kring tơniăn troăng măng, kong prâi, hnê hriâm – hnê mơjiâng, mơjiâng mơngế pêi cheăng.

Pôa Phạm Minh Chính, Ngế pro xiâm hnê ngăn tơnêi têa tơdah Kăn xiâm pơkuâ kong têa Singapore

Tơdrêng amê, pơkâ thế péa tơnêi têa la ngiâ mơjiâng ‘’Tơrŭm cheăng kâ xúa kŏng ngê̆ - cheăng kâ krúa lĕm Việt Nam – Singapore’’. ‘Na mâu tơdroăng kơpong ƀă lâp plâi tơnêi, péa kăn pơkuâ môi tuăn pơtối tơrŭm cheăng krá tơniăn rak tơrŭm môi tuăn, hnoăng cheăng tíu xiâm dêi ASEAN; rak troăng tơmiât pêi tơdjuôm dêi ASEAN tung tơdroăng têa kơxĭ Biển Đông.

Péa kăn xiâm pơkuâ môi tuăn thăm pêi pro tâ mê nếo mâu kơvâ cheăng ki rơdêi mê tơrŭm cheăng kâ, tê mơdró tung ASEAN, ing mê thăm tơrŭm tung mâu kơvâ cheăng ki ê.

VOV/Tơplôu: A Sa Ly