Kơxo lơ 5/6, pôa Phạm Minh Chính, Ngế pro xiâm hnê ngăn tơnêi têa hiăng ai roh tơdah pôa Thani bin Ahmed Al Zeyoudi, Kăn xiâm pơkuâ tê mơdró lâp plâi tơnêi, ối tung Khu xiâm pơkuâ tê mơdró UAE (Mâu kong têa tung Arab Thống nhất). Pôa Phạm Minh Chính, Ngế pro xiâm hnê ngăn tơnêi têa tối rơdêi UAE cho môi tung mâu khu cheăng kâ ối má môi dêi Việt Nam a kơpong Trung Đông.

Mơhé trâm hên pá puât xua pơreăng ƀă tơdroăng lâp plâi tơnêi, laga pêi lo liăn tê mơdró pơla péa pâ hơnăm 2022 hiăng châ vâ chê 5 rơtal dollars. Tung la ngiâ, Ngế pro xiâm hnê ngăn tơnêi têa pơkâ thế péa pâ thăm tơrŭm cheăng kâ, tê mơdró, mơ’no liăn cheăng, tung mê thăm pêi pro rơdêi tơpui tơno tơkêa Khu tơrŭm cheăng kâ tŭm têk Việt Nam – UAE rĕng má môi; pơkâ thế UAE po rơdâ kơchơ mơdró ăm tơmeăm tê ngi kong têa ê dêi Việt Nam.

Ngế xiâm pơkuâ tê mơdró UAE mơnhên Việt Nam cho khu tơrŭm ki kal dêi UAE, ki má lối cho tung mơnhông mơdêk tê mơdró ƀă ASEAN, tối péa pâ ai hên tíu ki môi tiah vâ tŏng kum dêi pó mơnhông mơdêk.