Kơxê lơ 27/6, a Đại lễ đường Nhân dân, pơlê kong xiâm Bắc Kinh, kong têa Sinuâ, pôa Phạm Minh Chính, Ngế pro xiâm hnê ngăn Chin phuh hiăng tơpui tơno ƀă kăn xiâm pơkuâ hnê ngăn Đảng Khu pơkuâ Tíu xiâm Đảng Kŏng san Sinuâ, Kăn hnê ngăn tơnêi têa Kŏng hòa nhân dân Trung Hoa cho pôa Tập Cận Bình. A rôh tơpui tơno, pôa Phạm Minh Chính tối nhên Việt Nam kơhnâ tiô troăng hơlâ “môi Sinuâ”, tơmâng ngăn mâu tơdroăng tơmiât rơkê tung lâp plâi tơnêi dêi Sinuâ ƀă hbrâ rơnáu tơpui tơno ‘na mâu tơdroăng ki tơmiât rơkê kố.

Pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa tối nhên, Sinuâ ngăn Việt Nam cho troăng tơmiât kơjo kum tung tâi tâng troăng hơlâ tơpui kâ tơnêi têa ki achê dêi Sinuâ; kố cho tơdroăng rah xo tung la ngiâ dêi Sinuâ tung mơnhông mơdêk ton xŏn dêi tơrŭm cheăng Sinuâ – Việt Nam; rơhêng vâ ƀă hbrâ rơnáu thăm mơdêk tơrŭm cheăng péa Đảng, péa tơnêi têa rế hía rế mơnhông, prôk trâu hngế, ai pơxúa.

Péa pâ tơpui tơno ‘na mâu tơdroăng tung lâp plâi tơnêi, tung kơpong ki péa pâ rơtế vâ ‘nâi plĕng, môi tuăn rơtế hbrâ mơdât ƀă pơkâ tơleăng tơxâng mâu tơdroăng ôh tá môi tuăn, rak vế hơniâp lĕm, tơniăn a têa kơxĭ, ‘mâi mơnhông tơdroăng ki bro tơ’lêi hlâu ăm tơdroăng mơnhông mơdêk dêi rêm tơnêi têa.