A rôh tơpui phôn, pôa Phạm Minh Chính, Ngế pro xiâm hnê ngăn Chin phuh tối rơdêi Việt Nam hbrâ rơnáu veăng tung mâu tơdroăng mơ-eăm tơdjuôm dêi mâu kong têa tung lâp plâi tơnêi, tung mê, ai ASEAN, vâ tí tăng troăng hơlâ hơniâp lĕm ăm rôh tơxul tơxal nôkố. Tung pơla ai rôh tơxul tơxal ôh tá tơniăn, Ngế pro xiâm hnê ngăn Chin phuh mơnê ƀă pâ thế Chin phuh Qatar pơtối tơmâng ngăn, rak vế gâk kring, tơniăn ăm kuăn pơlê Việt Nam a Qatar ƀă pro tơ’lêi hlâu ăm kuăn pơlê Việt Nam mot lo tung Qatar.

Ngế pro xiâm hnê ngăn kong têa Qatar tối rơdêi kô rak vế gâk kring, tơniăn ăm kuăn pơlê Việt Nam “môi tiah kuăn pơlê Qatar”. ‘Na tơrŭm cheăng on tơhrik pơla péa tơnêi têa tung pơla ai tơdroăng ôh tá tơniăn tiah dế nôkố, Ngế pro xiâm hnê ngăn kong têa Qatar tối rơdêi Qatar dế kơdo mơ-eăm pêi pro tŭm mâu tơdroăng tơhrâ, tơkêa ƀă khu tơrŭm cheăng, hbrâ rơnáu tơrŭm krá tơniăn vâ rak vế tơniăn tê mơdró têa châu têa kơxăng a Việt Nam.