Kơxê lơ 9/5, pôa Phạm Minh Chính, Ngế pro xiâm hnê ngăn tơnêi têa hiăng ai roh trâm mâ pơla péa pâ ƀă pôa Joko Widodo, Kăn xiâm pơkuâ kong têa Indonesia klăng roh veăng Hneăng hôp khu râ kăn xiâm ASEAN roh má 42 a Labuan Bajo, Indonesia. A roh trâm mâ, pôa Phạm Minh Chính, Ngế pro xiâm hnê ngăn Chin phuh mơnhên Việt Nam đi đo nhuô̆m ƀă pói vâ thăm tơrŭm tâ mê nếo tơrŭm cheăng ton xŏn ƀă Indonesia.

Péa kăn xiâm pơkuâ môi tuăn mơnhông tâ mê nếo tơrŭm cheăng tiô khôi vâi krâ nah krá tơniăn, mơjiâng tơdroăng djâ tơrŭm cheăng ton xŏn Việt Nam – Indonesia mơnhông mơdêk a râ a ‘ngêi tâ; tối tơrŭm cheăng dêi péa tơnêi têa cho ton xŏn, ôh tá xê to ƀă péa tơnêi têa mê ối veăng kum hơniâp lĕm, tơniăn ƀă mơnhông mơdêk dêi kơpong.

Pôa Phạm Minh Chính mơnhên tối Việt Nam kô pơtối tơrŭm cheăng ƀă tŏng kum Indonesia pôu râng hnoăng cheăng châ tơƀrê hnoăng Kăn xiâm hnê ngăn ASEAN 2023, kum thăm thăm tơrŭm, môi tuăn, hiâm mơno mơ-eăm xêh ƀă hnoăng cheăng tíu xiâm dêi ASEAN.