Kơxê lơ 10/5, pôa Phạm Minh Chính, Ngế pro xiâm hnê ngăn Chin phuh hiăng trâm mâ pôa Ferdinand Romualdez Marcos, Kăn xiâm pơkuâ kong têa Philippines klăng roh veăng Hneăng hôp Khu râ kăn xiâm ASEAN roh má 42 a pơlê kong kân Labuan Bajo, Indonesia. A roh trâm mâ, pôa Phạm Minh Chính mơnhên pói vâ pêi trâu hơngế tâ nếo tơrŭm cheăng kố, djâ pơxúa ăm kuăn pơlê, veăng kum ăm hơniâp lĕm, gâk kring ƀă tơniăn a kơpong. péa pâ môi tuăn thăm tơpui tơno khu râ kăn xiâm ƀă mâu râ, tung mê ai tơpui tơno túa ki rơkê tơtro pơla mâu Đảng pơkuâ, trâm mâ tơpui tơno kuăn pơlê.

Péa Kăn xiâm pơkuâ mơnhên khŏm mơ-eăm djâ pêi lo liăn tê mơdró pơla péa pâ châ 10 rơtal dollars ing mâu troăng pro tơ’lêi hlâu lôu péa kơchơ mơdró ăm mâu tơmeăm tê ngi kong têa ê ki xiâm dêi rơpó. Pôa Phạm Minh Chính mơnhên Việt Nam đi đo hbrâ xing xoăng ăm phái ton xŏn, tơniăn ƀă yă tơtro ăm kong têa Philippines, ing mê kum tŏng kum Philippines tơniăn bê kế kâ.