Klăng roh veăng Hneăng hôp tơpui tơno cheăng kâ lâp plâi tơnêi (WEF) a Tian Jin (Thiên Tân), kong têa Sinuâ, hâi lơ 27/6, pôa Phạm Minh Chính, Ngế pro xiâm hnê ngăn Chin phuh hiăng ai roh trâm mâ pơla péa pâ ƀă jâ Mia Mottley, Ngế pro xiâm hnê ngăn kong têa Barbados ƀă pôa Chris Hipkins, Ngế pro xiâm hnê ngăn kong têa New Zealand.

A roh trâm mâ ƀă jâ Mia Mottley, Ngế pro xiâm hnê ngăn kong têa Barbados, péa pâ môi tuăn kal pêi pro rơdêi mâu tơdroăng tơpui tơno thăm hlê plĕng dêi pó. Pôa Phạm Minh Chính tối nhên, kong têa Barbados cho kong têa a tíu ki kal tung kơpong Caribe, pói vâ ing kong têa Barbados, Việt Nam kô thăm tơrŭm tâ mê nếo ƀă kơpong.

Jâ Mia Molttley, Ngế pro xiâm hnê ngăn kong têa Barbados mơnhên hbrâ rơnáu pro kông tơdjêp vâ Việt Nam thăm tơrŭm cheăng bă mâu kong têa Caribe.

A roh trâm mâ pơla péa pâ ƀă Ngế pro xiâm hnê ngăn kong têa New Zealand, pôa Phạm Minh Chính mơnhên Việt Nam nhuô̆m khât ƀă pói vâ thăm mơdêk tơrŭm cheăng ton xŏn ƀă kong têa New Zealand.

Péa Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng ki tơdjâk thăm pêi pro rơdêi mâu tơdroăng mơhnhôk mơ’no liăn cheăng, lôu péa tâ mê nếo kơchơ mơdró ăm tơmeăm dêi pó, tung mê ai tơmeăm pêi lo ing chiâk deăng ƀă la ngiâ ki xiâm djâ pêi lo liăn tê mơdró péa pâ châ 2 rơtal dollars tung hơnăm 2024.