Hâi lơ 14/5, a Pơlê kong kân Cần Thơ, pôa Phạm Minh Chính - Ngế pro xiâm hnê ngăn Chin phuh trâm mâ kuăn pơlê  ƀă mâu kŏng nhân ki pêi cheăng tung pơlê kong kân Cần Thơ hdrối rôh hôp má 5, Kuô̆k hô̆i hneăng 15. Tơbleăng a rôh trâm kuăn pơlê, pôa Phạm Minh Chính, Ngế pro xiâm hnê ngăn tơnêi têa hiăng tơbleăng ăm kuăn pơlê mâu tơdroăng 'na cheăng kâ rêh ối tung tơnêi têa ƀă lâp plâi tơnêi, mâu tơdroăng xơpá, pơloăng mơnúa tơdjâk troh tơdroăng rêh ối dêi kuăn pơlê. Ngế pro xiâm hnê ngăn tơnêi têa tối mâu tơdroăng kơ-êng, pâ thế dêi kuăn pơlê  tơxâng ‘nâng, kal thế tiâ ăm kuăn pơlê ‘nâi tung la ngiâ.

Ngế pro xiâm hnê ngăn tơnêi têa hiăng tối 12 tơdroăng tung tâi tâng ‘na mơnhông cheăng kâ rêh ối ƀă tah lôi ki xơpá mơnhông pêi cheăng kâ tê mơdró mâu khu tơdroăng ki kuăn pơlê tơmâng vâ ‘nâi plĕng, tung mê tối nhên ki xơpá thế tah, pơloăng mơnúa thế tơkâ luâ, ai tuăn châ pêi pro tro tiô pơkâ tơniăn cheăng kâ kân, séa ngăn liăn ôh tă kơnâ, mơnhông mơdêk cheăng kâ, tơniăn tơdrâng tơ’mô kân; Tơniăn kal kí; po rơdâ tơrŭm cheăng ƀă mâu kong têa tung lâp plâi tơnêi.

Xuân a rôh trâm mâ kuăn pơlê, pôa Phạm Minh Chính, Ngế pro xiâm hnê ngăn Tơnêi têa ƀă khu kăn Kuô̆k hô̆i Cần Thơ hiăng diâp tơmeăm, mơhnhôk 300 ngế kŏng đoân viên ƀă mau kŏng nhân ki pêi cheăng ai tơdroăng rêh ối xơpá thế kơdo mơ-eăm pêi cheăng.