A rôh po tơdroăng, Khu tơkŭm po hiăng diâp tơdroăng ki ô eăng 190 ngế khu mơdró kâ ki kơhnâ rơkê ai kế tơmeăm ki châ inâi tơnêi têa Việt Nam hơnăm 2024. Tơpui a rôh po tơdroăng, pôa Phạm Minh Chính, Ngế pro xiâm hnê ngăn Chin phuh pơkâ thế, mâu khu mơdró kâ ki châ inâi tơnêi têa tối krê ƀă mâu khu mơdró kâ, khu tê mơdró Việt Nam tối tơdjuôm kal pơtối mơdêk mâu tơdroăng ki kơnía xiâm. Ki dâi lĕm – Pơhlêh nếo – Tơmiât rơkê – Ivá djâ troăng ahdrối.

Tung la ngiâ ah, Ngế pro xiâm hnê ngăn tơnêi têa pơkâ thế mâu khu mơdró kâ kal ôh tá la lâi pơtê tơbleăng rôh ki tơ’lêi hlâu troăng mơnhông ngiât ƀă mơnhông ki pơxúa krá ton; djâ troăng ahdrối tung rôh kăch măng ngiât; xúa ki pơxúa loi tơngah dêi kế tơmeăm ƀă inâi tơnêi têa Việt Nam; kơhnâ tăng ‘nâi, po rơdâ kơchơ tê mơdró a kong têa ƀă veăng trâu hngế tung mâu tíu tê mơdró lâp plâi tơnêi.