Drêng troh tơbâ 75 hơnăm hâi Pôa Hồ Chí Minh Kăn xiâm hnê ngăn tơnêi têa ki apoăng thế djâ tơ’noăng pâ nhoăm tơnêi têa (11/6/1948 - 11/6/2023), kơxo hâi lơ 11/6, a Hà Nội, Hô̆i đong Tơ’noăng khĕn kơdeăn Tíu xiâm tơnêi têa po kân krip hâi hôp khĕn kơdeăn, ô eăng mâu ngế rơkê tung lâp tơnêi têa. Pôa Phạm Minh Chính - Ngế cheăng tung khu xiâm kal kí, Ngế pro xiâm hnê ngăn Chin phuh, Kăn hnê ngăn Hô̆i đong Tơ’noăng - Khĕn kơdeăn xiâm tơnêi têa pơkuâ hâi hôp ƀă ai ƀai pơchuât ki kal.

Tơbleăng a rôh leh, ai 700 ngế ki rơkê kơhnâ - mâu kơpâu reăng  tơ-eăng lĕm tung kơdrum dêi tơdroăng mơhnhôk tơ’noăng pâ nhoăm tơnêi têa, châ mâu ngế ki kơhnâ, teăng mâ ăm rơtuh ngế pú hên, mâu ngế ki kơhnâ, rơkê tung tŭm tơdroăng, tung lâp tơnêi têa; Ngế pro xiâm hnê ngăn tơnêi têa tối loi khât tiah kố, ối hên ngế ki ôh tá tơpui ôh tá tối ăm ‘nâi dêi tơná cho ngế ki pêi troăng lĕm dế hâi măng veăng ‘no hnoăng cheăng pêi, tuăn rơkê, cho xiâm ki rơdêi dêi tơnêi têa a tâi tâng mâu tơdroăng cheăng, tung râ kuăn pơlê ƀă tung kuăn pơlê pin a tung tơnêi têa xuân môi tiah a kong têa ê.

Ngế pro xiâm hnê ngăn tơnêi têa púi vâ mâu ngế ki rơkê pôi tá tơngôu, pôi tá tâ hiăng hôm tơdroăng tơdroăng pêi, đi đo rak hnoăng cheăng tuăn ngôa, ki kơhnâ, pơtối mơ-eăm tâ nếo, đi đo mơnhông mơdêk, pleăng hên tâ nếo hnoăng tơná ăm pơlê pơla, tơnêi têa ƀă kuăn pơlê.