Tơdroăng tơkêa bro 500kV mạch 3 hiăng châ Grup ngăn on tơhrik Việt Nam pơcháu ăm Khu xiâm pơkuâ ngăn troăng kơxái ki mơ’no on tơhrik dêi Tơnêi têa pro xiâm pơkuâ ‘no liăn, ai tâi tâng ki xŏn 519km, 1,177 to trăng kơxái, 513 tíu krâ ‘măn, tơkâ luâ 211 to cheăm bêng dêi 43 tơring dêi 9 to kong pơlê ƀă tâi tâng kơxô̆ liăn ‘no mơjiâng lối 22.300 rơtal liăn.

Tơbleăng a rôh hôp, pôa Phạm Minh Chính - Ngế pro xiâm hnê ngăn tơnêi têa tối nhên, klêi pro tơdroăng tơkêa kố kô veăng mơdêk ki loi khât, ki rơdêi kơvâ ngăn cheăng pêi ngăn on tơhrik. Ngế pro xiâm hnê ngăn tơnêi têa tối nhên Đảng hiăng hnê mơhno, Chin phuh hiăng môi tuăn, Kuô̆k hô̆i vâ môi tuăn, kuăn pơlê vâ há, mê bú to pêi pro, ôh tá tơpui vêh rŏng. 

‘Na tơdroăng dêi hơnăm 2024, Ngế pro xiâm hnê ngăn tơnêi têa tối nhên kơvâ ngăn on tơhrik pê klêi tơdroăng cheăng, púi vâ kơvâ ngăn on tơhrik tung hơnăm 2025 ‘na hnoăng pêi thế hên tâ hơnăm 2024 ƀă pơtối ôh tá pá ‘na xúa on tơhrik.