A rôh tơdah, pôa Bùi Thanh Sơn - Ngế pro xiâm phŏ hnê ngăn tơnêi têa tối troăng rơhlâ dêi Việt Nam cho veăng môi tuăn ƀă troăng hơlâ péa tơnêi têa, tung mê ai tơdroăng mơjiâng môi Tơnêi têa Palestine tơniăn krê ƀă ai hnoăng pơkuâ dêi, ngăn tiô troăng tơkăng kong xoăng hdrối hơnăm 1967 ƀă Peăng mâi lâi lo Jerusalem cho pơlê kong xiâm, tơtro ƀă luât lâp plâi tơnêi ƀă mâu pơkâ ki tơdjâk troh dêi Khu lâp kong têa.

Ngế gum pêi hnoăng cheăng ăm Kăn xiâm pơkuâ kong têa Palestine tối Việt Nam cho ki vâ mơhno troăng, xiâm ki mơhno ăm kuăn pơlê Palestine pơtối mơ-eăm tơplâ tơbriât pơkuâ dêi tơnêi têa, chiêng pơkâ ƀă chiâng  phêp vâ mơjiâng Tơnêi têa Palestine tơniăn krê. Péa tơnêi têa vâ  môi tuăn pơtối tăng troăng pêi pro mâu tơdroăng tơkâ luâ xơpá, mơnhông tơrŭm tung mâu kơvâ cheăng ai hlâu ki ê mê cho tê mơdró, hnê hriâm, khoa hok kơmăi kơmok, pêi chiâk, po hen rôh trâm mâ mơhno túa lĕm tro, tơdjêp ƀă kuăn pơlê péa tơnêi têa. Ing mê, péa pâ vâ môi tuăn  tơbleăng mâu luât tơrŭm cheăng pơla péa pâ.