Kơxê hâi lơ 28/5 a kong pơlê Hà Giang, pôa Phạm Minh Chính, Ngế pro xiâm hnê ngăn Chin phuh veăng leh pơxiâm vâ pro troăng kân tơdrăng lĕm Tuyên Quang – Hà Giang (pơla rôh má 1). Pơla hdrối mê hía nah, Đảng Tơnêi têa, Chin phuh hiăng ‘măn hên kơxô̆ liăn vâ mơnhông pro troăng kân, xoăng kơxô̆ liăn vâ pro troăng a tíu dế kal pro a mâu kơpong, mâu kong pơlê. Tơbleăng a rôh leh, pôa Phạm Minh Chính - Ngế pro xiâm hnê ngăn Chin phuh tối nhên, tơdroăng Tơkêa bro troăng kân tơdrăng lĕm sap Tuyên Quang - Hà Giang ki xŏn gá 105 km, tâi tâng kơxô̆ liăn ‘no mơjiâng pro 10 rơpâu rơtal liăn, châ Chin phuh xing xoăng ăm péa kong pơlê Tuyên Quang ƀă Hà Giang pro kơ koan xiâm rak ngăn, pêi pro tiô tơdroăng ‘no liăn mơjiâng pro tung Tơdroăng ‘mâi mơnhông mơdêk cheăng kâ rêh ối.

Kô xuân cho tơdroăng ki nhên vâ pêi pro tiô Pơkâ dêi Khu xiâm kal kí ‘na troăng rơhlâ mơnhông cheăng kâ-rêh ối, tơniăn cheăng lêng, kring tơniăn Kơpong tơbăng kong ngo ƀă kong ngo peăng Kơnhóng troh hơnăm 2030, tơmiêt ngăn tơdroăng vâ pêi troh hơnăm 2045. Ngế pro xiâm hnê ngăn tơnêi têa pâ thế, klêi Leh pơxiâm pro, pâ thế mâu kơ koan, tíu pêi cheăng tơkŭm tăng mơngế pêi, tơ’noăng pêi cheăng vâ pê klêi hnoăng cheăng ki hiăng pơcháu.