VOV4.Xơ Đăng - Tơbleăng a hâi Leh tơbâ khu mơdró Việt Nam lơ 13/10 ƀă ô eăng khu mơdró Việt Nam ki kơhnâ rơkê a kơxo lơ 12/10, Ngế pro xiâm hnê ngăn Chin phuh pơtroh rơkong rơkâu ki lĕm tro má môi troh khu mơdró, mâu ngế cheăng mơdró kâ dêi Việt Nam, rơkâu mâu khu mơdró mâu ngế ki cheăng mơdró kâ dêi Việt Nam rế mơnhông tơƀrê xông rơdêi, pơtối ‘no hên hnoăng cheăng tâ nếo tung tơdroăng mơjiâng tơnêi têa Việt Nam rơdêi, hơniâp lĕm.

Nôkố Việt Nam hiăng ai vâ chê 900 rơpâu khu mơdró dế pêi tơdroăng cheăng. Khu mơdró kâ tung lâp tơnêi têa troh nôkố hiăng châ chât rơtuh ngế. kơpong mơdró kâ ki veăng ‘no hên lối 60% GDP, dâng 30% tung tâi tâng kơxô̆ mơngế pêi cheăng dế  pêi mâu tơdroăng cheăng. Tơbleăng a hâi leh, pôa Phạm Minh Chính, Ngế pro xiâm hnê ngăn tơnêi têa tối, Chin phuh kô pơtối mơjiâng, pê klêi luât pơkâ, mơdêk tơpui tơno, rơtế ƀă, tơmâng, tối ăm dêi rơpó ‘nâi tơdroăng tơleăng mơnhên mâu tơdroăng ki xơpá, pơloăng mơnúa, pâ thế dêi khu mơdró.

Ngế pro xiâm hnê ngăn tơnêi têa xup um tơbâ rơtế ƀă mâu ngế pơkuâ mơdró

Peăng khu mơdró, mâu ngế cheăng ‘na mơdró kâ dêi Việt Nam Ngế pro xiâm hnê ngăn tơnêi têa púi vâ mâu khu mơdró pơtối mơdêk ivá tơbriât cheăng tung pêi lo tơmeăm, tê mơdró tơmeăm pêi lo tơná, veăng mơnhông cheăng kâ- rêh ối dêi tơnêi têa.

A Leh ô eăng, pôa Phạm Minh Chính, Ngế pro xiâm hnê ngăn Chin phuh hiăng diâp ăm 10 khu mơdró dêi Việt Nam ki kơhnâ rơkê má môi dêi Việt Nam hơnăm 2022, khu tơkŭm po hiăng diâp ăm 6 khu mơdró ai hnoăng kân veăng ‘no tung hbrâ mơdât pơreăng COVID-19 ƀă diâp ăm 60 to inâi pêi cheăng tê mơdró rơkê dêi Việt Nam hơnăm 2022.

VOV Tây Nguyên/Tơplôu: Gương