Kơmăng lơ 2/11, a Hngêi hôp kân Tơnêi têa, pôa Nguyễn Xuân Phúc, Ngế pro xiâm hnê ngăn Chin phuh veăng leh tơbleăng tơmeăm pêi lo châ mơnhên râ tơnêi têa Việt Nam roh má 8, hơnăm 2022. Mê cho môi tơdroăng po leh kân, ai hên ki pơxúa vâ ô eăng mâu inâi tơmeăm pêi lo, tê mơdró tơƀrê, ai hên ngế vâ rôe, mơhno ki mơnhông rơdêi dêi khu mơdró Việt Nam ƀă tơdroăng cheăng kâ, veăng mơnhông inâi tơmeăm tê mơdró Việt Nam rế hmâ, hên ngế vâ rôe tâ tung tơnêi têa ƀă kong têa ê.

Kơ’nâi vâ chê 20 hơnăm tơbleăng pêi, kơxô̆ khu mơdró ki ai tơmeăm pêi lo châ mơnhên inâi râ tơnêi têa pơtối tâk rêm hơnăm, sap 30 khu mơdró hơnăm 2008 tâ 173 khu mơdró hơnăm 2022. 172 khu mơdró pêi châ mơnhên inâi râ tơnêi têa hơnăm 2022 ăm hlo tơ ƀrê khât tung tê mơdró ƀă tâi tâng kơxô̆ liăn pêi lo hơnăm 2021 dâng 1.570 rơpâu rơtal liăn, nap ăm hngêi rak liăn ngân tơnêi têa vâ chê 129 rơpâu rơtal liăn, kum tăng cheăng pêi, tơ’mot tơ’nôm kơxô̆ liăn pêi lo ăm vâ chê 600 rơpâu ngế ki pêi cheăng, pêi tro mâu luât pơkâ tŏng kum tung rêh ối pơlê pơla ƀă hnoăng pêi pro dêi pơlê pơla, dêi khu mơdró.

Pôa Phạm Minh Chính, Ngế pro xiâm hnê ngăn tơnêi têa lăm ngăn tíu tơbleăng um tơmeăm châ mơnhên tối tơmeăm tơnêi têa Việt Nam hơnăm 2022. 

Teăng mâ kăn xiâm Đảng Tơnêi têa, pôa Phạm Minh Chính hâk mơnê rơkâu 172 khu mơdró ki ai tơmeăm châ mơnhên tối inâi tơmeăm râ tơnêi têa hơnăm 2022; hlối tối nhên nôkố, tơdroăng mơjiâng ƀă mơdêk inâi tơmeăm pêi lo râ tơnêi têa ai pơxúa khât ƀă mê xuân cho hnoăng cheăng pêi ki hơngăm hngo la ro dêi khu mơdró, khu mơdró rơkê dêi Việt Nam.