Kơxê măng lơ 21/5, pôa Phạm Minh Chính, Ngế pro xiâm hnê ngăn tơnêi têa rơtế khu râ kăn teăng mâ kăn pơkuâ Việt Nam nếo mơgêi lĕm tơniăn roh lăm pôu pêi cheăng a kong têa Nhuk. Tung pơla tá hâi châ pái hâi pêi cheăng, pôa Phạm Minh Chính pơkuâ, veăng dâng 40 tơdroăng, mê cho mâu roh hôp dêi Hneăng hôp khu râ kăn xiâm G7 po rơdâ, mâu roh trâm mâ ƀă khu râ kăn pơkuâ kong têa Nhuk, mâu khu râ kăn, khu tê mơdró, pú hmâ kong têa Nhuk ƀă mâu roh tơpui tơno, trâm mâ ƀă khu râ kăn pơkuâ mâu kong têa ƀă mâu khu tơrŭm lâp plâi tơnêi.

Ƀă kong têa Nhuk, mâu roh tơpui, tơno dêi Ngế pro xiâm hnê ngăn tơnêi têa ƀă Ngế pro xiâm hnê ngăn kong têa Nhuk, Kăn pơkuâ kong pơlê Hiroshima ƀă kơdrâm mâu kăn dêi kong têa Nhuk hiăng veăng kum mơdêk tâ mê nếo tơdroăng loi tơngah kal kí, thăm pêi pro rơdêi tơrŭm cheăng ton xŏn trâu rơdâ Việt Nam – Nhuk.

Pôa Phạm Minh Chính xuân hiăng ai chât roh trâm mâ tơpui tơno pơla péa pâ tiô hiâm mơno ôh tá kơtôa, tơdrăng, tá hiâm mơno ƀă tâi tâng mâu kăn pơkuâ G7, mâu kong têa ki châ krếo, mâu khu tơrŭm cheăng lâp plâi tơnêi vâ tơpui tơno mâu troăng pêi ki nhên, păng ‘nâng thăm pêi pro rơdêi tơrŭm cheăng pơla péa pâ ƀă thăm tơrŭm tung mâu tơdroăng ki péa pâ rơhêng vâ ‘nâi plĕng.