VOV4.Xơ Đăng - Klêi kơ’nâi Kơ koan xiâm ‘măn tơmeăm khoăng kong têa Mih mơdêk liăn rơkâ tơ’nôm 0,75 điêm kơpêng hrĭng a kơmăng hnah ƀă mâu hngêi arak liăn xiâm châu Âu ƀă hên kong têa ki ê hiăng hên roh mơdêk liăn rơkâ vâ hbrâ mơdât ƀă tơdroăng liăn chu rơpâ yă tâk rơdêi achê kố, kơxo lơ 28/7, pôa Phạm Minh Chính, Ngế pro xiâm hnê ngăn tơnêi têa hiăng pơkuâ roh hôp ƀă mâu Ngế xiâm ƀă kăn pơkuâ mâu Khu xiâm, kơvâ cheăng tơkŭm tơpui tơno mâu troăng pêi, troăng vâ mơdât tơtro a ngiâ ƀă ton xŏn vâ pơtối mơdât liăn chu rơpâ yă, tơniăn cheăng kâ kân ƀă thăm mơnhông pro tơniăn, mơnhông mơdêk cheăng kâ – rêh ối pơlê pơla.

Ngế pro xiâm hnê ngăn tơnêi têa pơchân, tơdroăng cheăng kâ tơnêi têa pin po cho kân, tơdroăng pêi tá hâi kân, ivá kâi trâng mê cho iâ, xua mê bu kal môi tơdroăng ôh tá tơniăn kŭn pakong kô tơdjâk kân troh tung tơnêi têa. Tung pơla mê, Ngế pro xiâm hnê ngăn tơnêi têa pơkâ mâu khu xiâm, kơvâ cheăng kong pơlê tơkŭm séa ngăn, ‘nâi tơdroăng, ôh tá tơngôu, mơdêk ivá mơnhên tối, tối hdrối, hbrâ pêi pro troăng hơlâ rĕng ƀă troăng pêi tơtro, teăm tơdrêng, ƀeăn ƀĕng, khoa hok, châ tơƀrê tá a ngiâ ƀă ton xŏn.

A Sa Ly tơplôu ƀă tơbleăng