Tiô rơkong krếo thế dêi pôa Samdech Techo Hun Sen, pôa Phạm Minh Chính, Ngế pro xiâm hnê ngăn tơnêi têa pin kô lăm pôu, pêi cheăng a kong têa Kul sap ing hâi lơ 8 troh lơ 13/11/2022. Hneăng lăm pôu ai tung pơla Việt Nam prế Kul pơtối mơdêk, mơnhông tơrŭm rêm kơvâ cheăng klêi kơ’nâi 55 hơnăm kĭ tơhrâ tơrŭm dêi pó. Kố xuân cho hneăng ki vâ lăm pôu păng ‘nâng troh a kong têa Kul ki apoăng dêi pôa Phạm Minh Chính, Ngế pro xiâm hnê ngăn kong têa drêng pôa hiăng to chiâng Ngế pro xiâm hnê ngăn Chin phuh tơnêi têa Việt Nam.

Tung hneăng lăm pôu kong têa Kul mê, pôa Phạm Minh Chính kô tơpui tơno ƀă pôa Hun Sen, Ngế pro xiâm hnê ngăn kong têa Kul, rơtế ƀă pôa Hun Sen veăng tơpui a Hneăng hôp mơ’no liăn tê mơdró kâ pơla Việt Nam ƀă kong têa Kul; klêi mê, kô trâm mâ pôa Norodom Sihamoni,  Kăn pơtáu kong têa Kul, pôa Say Chhum, Kăn xiâm hnê ngăn Kuô̆k hô̆i râ má môi kong têa Kul, pôa Heng Samrin, Kăn xiâm hnê ngăn Kuô̆i hô̆i ƀă hnối trâm mâ mâu kăn xiâm dêi kong têa Kul.