Kơxê lơ 25/6, pôa Phạm Minh Chính, Ngế pro xiâm hnê ngăn tơnêi têa ƀă khu râ kăn teăng mâ Việt Nam hiăng troh a pơlê kong xiâm Bắc Kinh, pơxiâm lăm pôu pêi cheăng kong têa Kŏng hoa kuăn pơlê Sinuâ ƀă veăng Hneăng hôp rêm hơnăm mâu khu djâ troăng ahdrối roh má 14 dêi Hneăng hôp tơpui tơno cheăng kâ lâp plâi tơnêi WEF.

A roh lăm pôu pêi cheăng kố, pôa Phạm Minh Chính, Ngế pro xiâm hnê ngăn tơnêi têa kô veăng tơpui tơno ƀă pôa Lý Cường, Ngế pro xiâm hnê ngăn Chin phuh kong têa Sinuâ; trâm mâ tơpui tơno ƀă pôa Tập Cận Bình, Kăn xiâm pơkuâ hnê ngăn Đảng, Kăn xiâm hnê ngăn kong têa Sinuâ; trâm mâ tơpui tơno ƀă pôa Triệu Lạc Tế, Kăn cheăng tung khu kăn xiâm teăng mâ kong têa Sinuâ.

Rơtế amê, pôa Phạm Minh Chính, Ngế pro xiâm hnê ngăn tơnêi têa veăng mâu roh hôp ki kal dêi Hneăng hôp rêm hơnăm mâu khu djâ troăng ahdrối roh má 14 dêi WEF; ai mâu roh trâm mâ pơla péa pâ ƀă Kăn xiâm hnê ngăn pơkuâ WEF, xuân môi tiah kăn pơkuâ hên kong têa, mâu khu tơrŭm lâp plâi tơnêi. Klăng roh kố, Ngế pro xiâm hnê ngăn Chin phuh mơdoh chôu phut trâm mâ mâu ngế Việt Nam rêh ối a kong têa Sinuâ; trâm mâ mâu ngế rơkê nhŏng o; veăng Hneăng hôp tơpui tơno khu tê mơdró Việt Nam – Sinuâ.