VOV4.Xơ Đăng - Kơxo lơ 13/9, pôa Phạm Minh Chính, Ngế pro xiâm hnê ngăn Chin phuh hiăng pơkuâ rôh hôp má 17 dêi Khu hnê mơhno hbrâ mơdât COVID-19. Rôh hôp châ tơkŭm po tơdrêng tiô troăng hyôh Internet pơla tíu xiâm mơ’no ƀă  Chin phuh ƀă 63 to kong pơlê, pơlê kong kân râ xiâm. Tơbleăng a rôh hôp, pôa Phạm Minh Chính ăm ‘nâi: Troh nôkố, pin ối rak tơniăn cheăng kâ kân, séa ngăn liăn ôh tá kơnâ, ‘mâi mơnhông cheăng kâ ƀă mơdêk pêi lo tơmeăm; tơdroăng rêh ối dêi kuăn pơlê châ ‘mâi hơ’lêh.

Pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp ‘na hnâ mơdât COVID-19

Mâu tơdroăng ki tơ-brê kơnôm ing kăn hnê ngăn hnê tro, teăm tơdrêng dêi Khu kăn xiâm Đảng, đi đo ƀă Khu xiâm kal kí, khu kăn hnê ngăn Đảng; tơdroăng rơtế ƀă, tơrŭm cheăng krá dêi Kuô̆k hô̆i, tơdroăng veăng tơmâng dêi khu xiâm kal kí... Pin hiăng pêi klêi troăng rơhlâ ‘na vaccine. Laga, nôkố hlo môi tiah tơngôu, pro ôh tá xâu kơ pơreăng. Tơdroăng pro tơngôu ôh tá xâu mê tơdroăng pâk vaccine chiâng ôh tá tơ-brê tiô pơkâ hnê mơhno dêi Khu kăn hnê mơhno cheăng.

Mê cho tơdroăng thế tối nhên. Ngế pro xiâm hnê ngăn tơnêi têa pơkâ thế, tơkâ luâ tơdroăng ôh tá bê pơkeăng, tơmeăm hbrâ, tơmeăm xúa tung khăm pơlât; pro tơniăn 'na mơngế cheăng khăm pơlât; mơdêk hnê tối, mơdêk tâ nếo tuăn tơmiât ‘nâi hbrâ mơdât pơreăng dêi kuăn pơlê.

Gương tơplôu ƀă tơbleăng