VOV4.Xơ Đăng - Kơxo lơ 27/9, pôa Phạm Minh Chính, Ngế pro xiâm hnê ngăn tơnêi têa pơkuâ hôp tơdrêng tiô troăng hyôh Internet ƀă 8 to kong pơlê kơpong Tơdế tơnêi têa ƀă Tây Nguyên ‘na tơdroăng hbrâ ví khía mơhot rôh má 4 plong mot. Tơbleăng hnê mơhno a hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên, tiô tối tơbleăng dêi mâu kơ koan khu râ pơkuâ cheăng, rôh khía mơhot kơxô̆ 4  plong mot rơ-iô, gá kô plong têi kơtâu rĕng.

Tâng hbrâ rơnáu tro drêng khía troh plong mot ko plong têi tâ tơdroăng tối hdrối la xuân tơniăn. La tung mâu hâi hdrối, mâu tơring, cheăm kong pơlê hiăngdjâ vâ chê 58 rơpâu toăng plong ƀă dâng 300 rơpâu ngế pêi cheăng châ hmuâ ví khía, djâ tơmeăm, djâ 4.500 hlâm pro long păn ká xi xŏng; chêh pơkâ hdrối ƀă djâ lối 100 rơpâu rơpŏng ƀă vâ chê 400 ropâu kuăn pơlê a mâu kơpong ki rơ-iô lăm ối tíu tơniăn.

Rơtâ tá hneăng hôp

Ngế pro xiâm hnê ngăn tơnêi têa hâk mơnê tơdroăng ‘nâi hbrâ rơnáu dêi mâu kong pơlê, pơlê kong kơdrâm kong kân, mâu ngế tung khu cheăng hnê mơhno. Ngế pro xiâm hnê ngăn tơnêi têa pơkâ thế Khu hnê mơhno, mâu khu xiâm kơvâ cheăng, kong pơlê pôi tơngôu, thế đi đo hbrâ rơnáu mơhé la lâi. 

VOV/Tơplôu: Gương