Hâi lơ 7/7, pôa Phạm Minh Chính, Ngế pro xiâm hnê ngăn tơnêi têa hiăng pơkuâ hneăng hôp mơ’no tung um tiô troăng hyôh Internet pơla Chin phuh ƀă Pơlê kong kân Hồ Chí Minh pơkâ mâu Tơdroăng xiâm dêi Kuô̆k hô̆i ‘na mâu troăng hơlâ, túa cheăng ki krê xêh vâ mơnhông Pơlê kong kân Hồ Chí Minh tung la ngiâ. Mơgêi roh hôp mê, pôa Phạm Minh Chính tối nhên, kal mơnhên tơdroăng pơkâ Hnoăng cheăng xiâm ti xê krê to Pơlê kong kân Hồ Chí Minh, tâng pêi pro châ tơƀrê khât mê lâp tơnêi têa xuân châ xúa ing tơdroăng mê. Ngế pro xiâm hnê ngăn pơkâ thế, mơ’no tơdrêng Tơdroăng pơkâ, tơdroăng cheăng dêi Chin phuh, ki vâ hrá hlái a măng tĭng la ngiâ, xing xoăng hnoăng cheăng i nhên, pơcháu ăm mâu Ngế pro xiâm phŏ djâ troăng.

Khu xiâm ngăn ‘na pơkâ mơ’no liăn cheăng tơrŭm ƀă Ƀơrô Chin phuh ƀă Pơlê kong kân Hồ Chí Minh vêh séa mơnhên ngăn mâu tơdroăng ki kal, ki xiâm vâ Chin phuh chêh mơ’no hlá mơ-éa, klêi mê, Chin phuh kô pơkâ hâi khế pêi pro, túa chêh bro hlá mơ-eá kal athế ‘nâng ‘nâi, nhên, hleăng, mâu Ngế pro xiâm phŏ hnê ngăn kô  pơkuâ ngăn dêi hnoăng cheăng ki hiăng châ Chin phuh pơcháu vâ mơnhên, pêi pro tiô mâu tơdroăng cheăng xing xoăng, mơnhên mâu rơkong tơpui tối, hnê khĕn ki ối pơrá phá dêi pó. Mâu khu xiâm, kơvâ cheăng kal pơkâ mơ’no mâu hlá mơ-éa hnê tối tro tiô hnoăng cheăng hiăng pơcháu. Ki vâ hrá hlái, mâu hlá mơ-eá pơkâ mê athế klêi a hâi lơ 15/8 la ngiâ.