VOV.Xơ Đăng - Kơxo lơ 12/9, pôa Phạm Minh Chính, Ngế pro xiâm hnê ngăn Chin phuh hiăng pơkuâ po Rôh hôp hnoăng cheăng hbrâ tơpâ mơdât on chếo ƀă mơgêi 5 pêi pro tơdroăng pơkâ 83 dêi Chin phuh ‘na hnoăng cheăng tŏng xo mâu ngế ki hliăng tiâ dêi khu lêng hbrâ tơpâ mơdât on chếo. Rôh hôp châ tơkŭm po ‘no tơdrêng ing troăng hyôh um tơvi pơla tíu ki mơ’no cho Tíu cheăng Chin phuh ƀă 63 to kong pơlê, pơlê kong kân tung lâp tơnêi têa. Tơpui a rôh hôp, pôa Phạm Minh Chính tối nhên, tung pơla hdrối kố nah, tơdroăng ki on chếo, trếo pơtôu, xía vâ hlo ôh tá tơniăn, xơpá vâ ‘nâi hdrối, hlo rế hía rế hên.

Pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp

Ngế pro xiâm hnê ngăn tơnêi têa tối nhên, mâu rôh trâm tơdroăng ki ó, cho rôh ki vâ tơbleăng ƀă ăm hlo tơdroăng kal pêi pro tơdrêng, pơkâ thế, hnoăng cheăng nếo ăm hnoăng cheăng hbrâ tơpâ mơdât on chếo vâ rak vế tơniăn kế tơmeăm ƀă malối cho châ chăn kuăn mơngế. Ƀă mâu rôh on chếo ki kân achê kố, Ngế pro xiâm hnê ngăn tơnêi têa pơkâ thế Khu xiâm ngăn kŏng an pơkâ thế séa ngăn, pêi pro nhên xiâm kối, hnoăng cheăng dêi mâu kơ koan rak ngăn tơnêi têa, khu kăn pơkuâ kong pơlê, kơ koan hbru ăm phêp, séa ngăn ƀă mâu ngế ki ai tơdjâk, rak vế tơdroăng ki tơdrăng.

Katarina Nga tơplôu ƀă tơbleăng