Kơxo lơ 25/4, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ hôp Khu hnê mơhno má môi Chin phuh ƀă mâu khu xiâm, kơvâ cheăng ‘na mâu troăng kơdroh liăn rơkê ăm mung; tơdroăng pêi cheăng tơdroăng mơdró phĭu liăn khu tê mơdró ƀă mâu troăng pêi tung la ngiâ.

Xông tơpui a roh hôp, pôa Phạm Minh Chính, Ngế pro xiâm hnê ngăn tơnêi têa tối nhên, pái khế apoăng hơnăm 2023 tơtêk cheăng kâ tơnêi têa pin iâ tâ tâng pơchông ƀă roh kố hơnăm 2022 xua tá mâu tơdroăng xiâm ing pá kong ƀă ing tơná pin. Vâ tơdroăng cheăng kâ tơniăn rĕng ƀă mơnhông mơdêk krá tơniăn kal mơnhên, pơkâ mơ’no mâu pơkâ xiâm, hnoăng cheăng, troăng pêi ki tơtro; tung mê pơtối tŏng kum khu tê mơdró, kuăn pơlê, thăm pêi pro rơdêi tơdroăng pêt mơjiâng tơmeăm, tê mơdró.

Ngế pro xiâm hnê ngăn tơnêi têa tối nhên, ahdrối thế xúa mâu tơmeăm dêi Tơnêi têa, dêi hngêi arak liăn vâ pơtối mơnhông ivá rơdêi tơdjuôm dêi tơnêi têa, mơhnhôk mâu khu râ vâ mơnhông mơdêk, ki rơhêng vâ tối cho tah lôi pá puât drêng kố, tung mê ai troăng vâ mơhnhôk khu râ tung mâu tơdroăng tơdjâk troh ‘na tơnêi tơníu, châ mung liăn, mơhnhôk kơxô̆ liăn dêi khu tê mơdró dêi kuăn pơlê, tíu mơdró phĭu liăn ƀă hía hé... ing mê pơkâ mơ’no mâu troăng hơlâ teăm tơdrêng. Tơdrêng amê pơtối châ hlo mâu tơdroăng tơvâ tơvân kal tah lôi; môi tuăn troăng tơmiât pêi, troăng vâ pơkâ mơ’no mâu troăng pêi ki tơtro.