Kơxê lơ 6/11, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah pôa Karl Van Den Bossche, Kăn teăng mâ kong têa Ƀih a Việt Nam klăng roh Kăn teăng mâ tơdah hnoăng cheăng a tơnêi têa pin. A roh tơdah, pôa Phạm Minh Chính, Ngế pro xiâm hnê ngăn Chin phuh mơnhên Việt Nam đi đo nhuô̆m tơrŭm cheăng ƀă Ƀih, tối pói tơngah tung hneăng cheăng dêi tơná, Kăn teăng mâ kô pơtối veăng kum hên tung tơdroăng mơdêk tơrŭm cheăng pơla Việt Nam ƀă Ƀih.

Ngế pro xiâm hnê ngăn tơnêi têa pơkâ thế péa tơnêi têa pơtối tơrŭm cheăng, môi tuăn dêi pó tung mâu hneăng hôp tơpui tơno rêm pâ ƀă khu tơrŭm lâp plâi tơnêi, ki má lối cho a Khu lâp kong têa, ASEM, Pơhlăng, ASEAN – EU ƀă hiá hé, ƀă tơrŭm tơkŭm po châ tơƀrê Hneăng hôp khu râ kăn xiâm ASEAN – EU mot tung dế măng tĭng khế 12 la ngiâ a Ƀih.

‘Na tơdroăng Biển Đông, péa pâ môi tuăn ki kal dêi tơdroăng rak hơniâp lĕm, tơniăn, gâk kring, tơniăn ƀă tơniăn krê troăng têa kơxĭ ƀă troăng tơƀai, tơleăng tiô troăng hơniâp lĕm mâu tơxup tơbriât tiô luât lâp plâi tơnêi, tung mê ai Mơ-éa tơkêa Khu lâp kong têa ‘na Luât têa kơxĭ 1982.