Xuân tung kơxê lơ 6/7, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah jâ Datin Paduka Malai Hajah Halimah Malai Haji Yussof, Kăn teăng mâ ki nếo kong têa Brunei a Việt Nam. Ngế pro xiâm hnê ngăn tơnêi têa mơnhên peăng Việt Nam kô tơrŭm krá tơniăn, pro tơ’lêi hlâu ƀă tŏng kum pơla péa tơnêi têa mơnhông mơdêk rế hía păng ‘nâng, tâi tâng, châ tơƀrê.

Ngế pro xiâm hnê ngăn tơnêi têa pơkâ thế tung hneăng cheăng dêi tơná, Kăn teăng mâ tơkŭm tơrŭm ƀă mâu kơ koan tơdjâk dêi Việt Nam ƀă Brunei pơtối thăm tơpui tơno khu râ kăn xiâm ƀă mâu khu râ, tơrŭm a mâu hneăng hôp tơpui tơno hên troăng; đi đo séa ngăn, mơhnhôk ƀă pêi pro châ tơƀrê mâu tơdroăng tơpui tơno dêi Khu râ kăn pơkuâ râ xiâm; tơrŭm pêi pro châ tơƀrê Tơdroăng pêi pro tơrŭm cheăng tâi tâng Việt Nam – Brunei hneăng hơnăm 2023 – 2027, tơkŭm tung 4 kơvâ cheăng ki kal mê cho têa châu têa kơxăng, hyôh on gas, pro tơmeăm kâ Halal, ôm hyô ƀă trâm mâ tơpui tơno pơla kuăn pơlê.