Kơxê hâi lơ 24/4, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Tơnêi têa hiăng tơdah mâu kăn ngăn ‘na pêi chiâk dêi mâu kong têa veăng Hôp tung lâp tơnêi têa rôh má 4  tơpui ‘na kế kâ krá tơniăn ton (SFS) pơxá “Pơ’lêh tơdroăng ‘na kế kâ tơniăn ton, hmâ ƀă hyôh kong prâi tá tung tơdroăng ôh tá tơniăn ki nếo’’.  

A rôh tơdah, Ngế pơkuâ Chin phuh Việt Nam pơkâ thế mâu kong têa dế  mơnhông mơdêk pêi tơƀrê tơrŭm cheăng  pơla Việt Nam ƀă mâu kong têa dế mơnhông tung lâp plâi tơnêi, tung mê Việt Nam vâ tối mâu tơdroăng tơrŭm cheăng, tơrŭm ƀă mâu kong têa tung mơnhông pêi chiâk, mơjiâng thôn pơlê, kơdroh kơklêa xăm kơtiê, rak tơniăn ‘na kế kâ ing mâu tơdroăng tơrŭm cheăng kâ pơla Việt Nam ƀă mâu kong têa dế mơnhông tung lâp plâi tơnêi,  Tơrŭm cheăng rêm pâ ƀă veăng kum, rơtế ƀă mâu khu tơrŭm cheăng lâp plâi tơnêi pơla rêm pâ ƀă hên tơdroăng pêi pro.

Vâ pêi châ tơƀrê, ai pơxúa tung pơ’lêh kế kâ ƀă mơdêk tơrŭm cheăng lâp plâi tơnêi tung mâu tơdroăng pêi chiâk deăng, mơjiâng thôn pơlê tung la ngiâ, Ngế pro xiâm hnê ngăn tơnêi têa pơkâ thế rêm pâ ki tơdjâk troh kal mơdêk hlê plĕng ‘na tơdroăng cheăng, hnoăng cheăng pêi dêi kơvâ pêi chiâk, mơjiâng luât cheăng, tơ’mot tăng liăng, tí tăng ‘nâi plĕng ƀă xúa kŏng ngê̆.