Peăng xêi hâi lơ 19/5, a pơlê kong kân Hiroshima, tung hnoăng cheăng ki pêi pro peăng kong têa Nhuk, pôa Phạm Minh Chính, Ngế pro xiâm hnê ngăn hiăng pơkuâ, tơdah Khu ngăn ‘na Pro tơleăng lĕm Hiroshima-Việt Nam, Khu Hiroshima - Việt Nam ƀă Khu ngăn ‘na tơrŭm pơla Việt Nam ƀă Nhuk a kong pơlê Hiroshima. A chôu phut tơdah mê, Ngế pro xiâm hnê ngăn pói rơhêng vâ mâu khu tơrŭm cheăng dêi Hiroshima pơtối tŏng kum vâ veăng mơnhông tơrŭm cheăng pơla Việt Nam ƀă Nhuk tối tơdjuôm ƀă Hiroshima tối krê rế hía rế krá kâk, tơƀrê, châ pơtối mơdêk tơhluâ hên tâ nếo mâu tơdroăng cheăng tung la ngiâ; krếo thế mâu khu mơdró kâ Hiroshima mơ’no liăn cheăng, tê mơdró kâ hên tâ a Việt Nam; thăm mơdêk tơrŭm tơpui tơno pơla kuăn pơlê, mơnhông mơdêk ‘na tơdroăng mơhno túa lĕm tro pơla peá pâ tơnêi têa; tŏng kum pơlê pơla mơngế Việt Nam a kơpong Tơdế tơnêi têa Nhuk, ai dâng 50 rơpâu ngế rêh ối, pêi cheăng ƀă pêi pro hên tơdroăng ki tơ’lêi hlâu, pơtối mơdêk hnoăng cheăng ki tơrŭm ki kal pơla péa pâ tơnêi têa.

Pôa Akagi Tatsuo, Kăn phŏ hnê ngăn Khu ngăn ‘na pro tơleăng lĕm Hiroshima-Việt Nam vêh mơnhên tối mâu khu ki tơrŭm cheăng kô pêi pro kơhnâ khât ăm mâu tơdroăng cheăng ki tro tiô troăng prôk, tơdroăng ki hnê tối dêi Ngế pro xiâm hnê ngăn, pơtối mơdêk hnoăng cheăng ki tơrŭm pơla Việt Nam ƀă kong têa Nhuk.