VOV4.Xơ Đăng - Kơxo lơ 17/10/2022, pôa Phạm Minh Chính, Ngế pro xiâm hnê ngăn Chin phuh hiăng tơdah Ngế xiâmpơkuâ tê mơdró ƀă pêt mơjiâng tơmeăm kong têa Australia cho pôa Tim Ayres klăng roh lăm pôu pêi cheăng a Việt Nam rơtế pơkuâ Hneăng hôp Khu râ kăn xiâm OECD - Peăng mâ hâi lo pá hdroh châu Á 2022 a Hà Nội.

Ngế pro xiâm hnê ngăn tơnêi têa pâ thế Ngế xiâm kong têa Australia tơmâng tâ mê tâ nếo tơrŭm cheăng kâ – mơdró – mơ’no liăn cheăng pơla péa tơnêi têa, tung mê ai tơdroăng Australia pơtối lôu péa kơchơ mơdró ăm mâu kế tơmeăm pêi lo ing chiâk deăng, ká xi xŏng Việt Nam; pro tơ’lêi hlâu ăm mâu khu mơdró Việt Nam mơ’no liăn cheăng a kongtêa Australia. Tơdrêng amê, mơhnhôk mâu khu tê mơdró Australia thăm mơ’no liăn cheăng a Việt Nam. Ngế pro xiâm hnê ngăn tơnêi têa pơkâ thế Australia pro tơ’lêi hlâu ăm mơngế Việt Nam a kong têa Australia rêh ối, pêi cheăng, mot tơrŭm cheăng tơ’lêi hlâu ƀă kong têa tíu rêh ối.

Ngế pro xiâm hnê ngăn tơnêi têa tơdah Ngế xiâm pơkuâ tê mơdró ƀă pêt mơjiâng tơmeăm kong têa Australia

Ngế xiâm kong têa Australia mơnhên Chin phuh Australia đi đo nhuô̆m tơrŭm cheăng ton xŏn ƀă Việt Nam ƀă pói vâ thăm rak krá tơniăn tâ pơla péa pâ ƀă  Việt Nam; thăm pêi pro tâ mê nếo tơrŭm cheăng ƀă Việt Nam tung mâu kơvâ cheăng kâ – tê mơdró – mơ’no liăn cheăng, pêi chiâk deăng, hnê hriâm - hnê mơjiâng, mơhno khôi túa lĕm tro, pêi cheăng.

VOV Tây Nguyên/Tơplôu: A Sa Ly