Kơmăng hâi lơ 28/6, pôa Phạm Minh Chính, ngế pro xiâm hnê ngăn Chin phuh ƀă khu kăn xiâm tơnêi têa Việt Nam hiăng lo ing pơlê kong xiâm Bắc Kinh, Sinuâ hiăng klêi hneăng lăm pôu kong têa Sinuâ ƀă veăng hôp tiah hmâ mâu kăn rơkê rôh má 14 dêi hneăng Hôp tơpui Cheăng kâ lâp plâi tơnêi (WEF). Kố cho hneăng lăm pôu Sinuâ ki apoăng dêi pôa Phạm Minh Chính drêng to pro ngế pro xiâm hnê ngăn Chin phuh.

Hneăng lăm pôu hiăng klêi tơniăn ƀă châ tơpui hên tơdroăng ki kal. Loi nhoăm dêi rơpó ‘na tơdroăng kal kí pơla péa tơnêi têa châ mơdêk tơdêi, pro xiâm vâ mơnhông mơdêk ƀă pro trâu rơdâ tâ nếo tơrŭm cheăng tung tŭm tơdroăng pơla Việt Nam - Sinuâ tung tơdroăng rêh ối nếo, pro pơxúa ăm kuăn pơlê péa tơnêi têa.

Ngế pro xiâm hnê ngăn tơnêi têa tơpui tơno ƀă tâi tâng 4 ngế kăn xiâm dêi Sinuâ. Péa pâ xuân tối nhên tơdroăng kal ‘na mơdêk loi nhoăm dêi rơpó tung tơdroăng kal kí, tơleăng mơnhên tro tơxâng ƀă séa tah ki ôh tá môi tuăn dêi rơpó, mơnhông djâ  tơrŭm cheăng tung tŭm tơdroăng pơla Việt Nam - Sinuâ mơnhông tơniăn, tơƀrê ton ta ah. 

 Pakĭng mâu tơdroăng cheăng ki kal, Ngế pro xiâm hnê ngăn Chin phuh veăng hôp ƀă tối tơbleăng a Hneăng hôp mâu Khu mơdró pơla Việt Nam - Sinuâ, ƀă veăng ai hên mâu khu mơdró dêi Sinuâ, trâm mâ tơrŭm cheăng, trâm hên khu mơdró ki kân dêi Sinuâ, lăm tăng ngăn vâ ‘nâi hlo kơpong ki nếo Hùng An- kơphô̆ túa nếo má môi ‘na tơdroăng lôu péa pêi cheăng kâ ƀă hơ’lêh nếo dêi Sinuâ a kong pơlê Hà Bắc.

Mâu khu mơdró xuân khĕn kơdeăn khât tơdroăng cheăng ƀă ki tơƀrê ‘na ‘no liăn cheăng dêi Việt Nam, hlối tối púi vâ po rơdâ ‘no liăn cheăng a Việt Nam tung la ngiâ.